Dr. MOISES FRUMENCIO DA COSTA GOMEZ, TATA DI DEMOKRASIA.

 

Dr. MOISES FRUMENCIO DA COSTA GOMEZ, TATA DI DEMOKRASIA.
27 òktober 1907 -†22 novèmber 1966
Awe, djaluna 22 di novèmber 2021 nos ta rekordá ku 55 aña pasá Dr. M.F. da Costa Gomez (Dòktor) a fayesé. Den un reunion speshal di Staten na aña 2013 a proklamá Dr. da Costa Gomez unánimamente: TATA DI DEMOKRASIA . Ta yam’é tata di demokrasia pasobra e tabata konvensí ku ta un pais basá riba prinsipionan di demokrasia só por yega na un parlamento elehí pa pueblo segun un sufragio universal (algemeen kiesrecht) den un sistema polítiko kaminda gobièrnu tin ku responsabilisá na Parlamento. Dr. da Costa Gomez ta e emansipador polítiko ku a hasi nos pueblo konsiente di su derechonan, pa e por disidí riba su futuro polítiko i pa un dia “bira bas den su mes kas” (outonomia). E ta é polítiko, ku for di tempu ku e tabata studia na Hulanda, tabata pensa kon saka Antia i Kórsou for di kolonialismo i transformánan den un era polítiko nobo. Prueba di esei ta su tesis ku ela doktorá pa bira Dòkter den Leinan Estatal (Dr.den Staatsrecht) na 1935 titulá: “Het Wetgevend Orgaan van Curaçao, Samenstelling bevoegdheid bezien in het kader van de Nederlandse Koloniale Politiek”.
Ora Dóktor a yega Kórsou bèk na aña 1936, nos tabata kompletamente bou di dominio kolonial,
kaminda Hulanda tabata manda riba nos sin ku nos tabata konosé nos derechonan polítiko. Den Dòkter su mente “revolushonario” el a okupá su mes ku e proseso kon kambia e rumbo polítiko di Kòrsou i di Antia. Den tempu kolonial bou di “Koloniale Raad”, e pueblo no tabatin nada di bisa. P’esei durante añanan e tabata programá e pasonan pa hasi e pueblo konsiente di su derechonan legal i polítiko. Ta hopi kos mester a kambia. Por ehèmpel den tempu kolonial no tabatin sufragio universal (algemeen kiesrecht).
Pa elekshon di Staten di 20 di desèmber 1937, gobernador Wouters, di e tempu ei a pone den Areglo di Estado 3 kondishon kaminda solamente hende hòmber di 23 aña p’ariba por a vota.
E 3 kondishonnan tabata:
1. Nan mester tatin 6 klas di skol basiko pagá o 7 klas di skol básiko di pornada.
2. E persona mester tabatin un entrada di por lo menos fls 1200,– pa aña i mester a paga a lo ménos fls 75,– na impuesto di tera (grondbelasting)
3. E mester tabatin “onroerende goederen” (propiedatnan manera kas, tereno, edifisio èts) .
Mirando e situashon den e tempu ei, ta solamente e gremio di protestant blanku i hudiu por a vota. Pa tabata sigur ku algun hende di koló por a vota, nan mester a aparesé dilanti di “Commissie ter
bestudering van algemene ontwikkeling” i pasa un eksamen ku yama “Proef van bekwaamheid ter
verkrijging van het kiesrecht”. Dòktor tabata haña esaki anti- demokrátiko. P’esei ela pensa ku mester a yega na un sufragio amplio mas lihé posibel i na outonomia. Ela kuminsá lucha na Kòrsou i na Hulanda pa logra esaki.
Ku un vishon klá e tabata bisa: “E pueblo aki mester liberá su mes di e gara kolonial i rigi su propio
destino politíko, pa un dia bira “bas den su propio kas” (ku ta outonomia)
”Mester hasi tur sakrifisio pa asina tur e generashonnan benidero tin nan balor propio i por ta
orguyoso di nan mes.”
Asina ela bira ko-fundador di e promé partido polítiko: Curaçaose Rooms-Katholieke Partij (den boka di pueblo: Partido Katóliko). Pa e pueblo partisipá na polítika, ku ta un sistema di demokrasia, mester a hiba hopi lucha ku Gobierno i Parlamento di Hulanda, tambe ku Partido Katóliko mes. Hulanda tabata
haña e mensahe ku pueblo, spesialmente hende muhé, no tabata klá pa vota. Konsekuensha di tur e
kontratiempunan aki i diferensha di opinion ku direktiva di Partido Katóliko, a pone ku Dòktor a kibra na 1948 ku Partido Katóliko i embarká riba un rumbo nobo i asina a lanta su propio partido, Partido
Nacional di Pueblo.Ela pensa un método kon yega mas serka di e pueblo. Ela usa e método di
“underground”. E sistema di “underground” a tuma lugá den un sekresia apsoluto, kaminda kada lider mester a buska 4 amigu ku ta reuní den su kas na ken e ta splika kiko ta polítika. Asina e movementu aki a multipliká i pueblo a gara na Partido Nashonal tras di Dòktor i gana elekshon na 1949, kaminda pa promé biaha hende muhé tambe por a vota.
Durante e periodo di 1952 pa 1954 Konferenshanan di Mesa Rondó a tuma lugá kaminda a deliberá
huntu ku Sürnam i Hulanda pa yega na un órden estatal nobo i outonomia.
Despues di hopi deliberashon e proyekto di “Statüt” a bira realidat i e époka di kolonisashon a kaba ora a firma Statüt na aña 1954.
Nos mester hasi tur kos pa no pèrdè nada di e lucha ku Dòktor da Costa Gomez a hiba pa yega na un gobernashon outónomo, kaminda nos mes ta atendé nos asuntonan interno. Base di Statüt ta
palabranan di Reina Wilhelmina: “Steunend op eigen kracht, doch met de wil elkander bij te staan”.
Partido Nacional di Pueblo ta opiná ku den un esfera di rèspèt mútuo entre Hulanda i Kòrsou, nos no
mester keda dirigí for di “Den Haag”. E pandemia di corona-virus, ku a kué hopi país i nos tambe for di base a hasi nesesario ku Gobierno di Hulanda, manera La Reina Wilhelmina a bisa, “de wil elkander bij te staan” a kai adén ku yudansa partikularmente financiero. Partido Nacional di Pueblo ta kontento di konstatá ku nos pueblo ta kumpliendo ku nan obligashon di belasting i ku nos ekonomia a kuminsá rekuperá. Awor nos mester kumpli ku palabrashonnan, (hasi nos “huiswerk”), pa nos bin para riba nos mes pia. Tur esaki ku un relashon ku Hulanda, basá riba rèspèt mútuo, kaminda no tin espasio pa menasa estilo “SI NO FONO”.
Partido Nacional di Pueblo ta opiná ku e lucha pa emansipashon ku Dòktor Moises Frumencio da Costa Gomez a hiba, mester sigui inspirá nos pa nos tur pone man na obra pa saka Kòrsou i su pueblo for di e situashon di krisis. Laga nos sigui embarká riba e kaminda di rekuperashon i huntu nos demonstrá ku nos sá di kuida e legado di Dòktor Moises Frumencio da Costa Gomez, ku berdat nos sa di traha pa nos ta “bas den nos mes kas”.

Direktiva di Partido Nacional di Pueblo
Kórsou 21-11-21

Share this page to Telegram

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: