PROMÉ MINISTER GILMAR PISAS A REUNÍ KU SEKRETARIO GENERAL DI NASHONNAN UNÍ SR. ANTÓNIO GUTTERES.

PROMÉ MINISTER GILMAR PISAS A REUNÍ KU SEKRETARIO GENERAL DI NASHONNAN UNÍ SR. ANTÓNIO GUTTERES.

 

Willemstad – Promé Minister Gilmar Pisas, huntu ku Promé Minister di Aruba Evelyn Wever-Croes, Promé Minister di Sint Maarten Silveria Jacobs, Promé Minister di Hulanda Mark Rutte i e Embahador di Reino Hulandes na e mishon permanente di Reino pa Nashonnan Uní na New York (PVNY) Joke Brandt tabatin un kombersashon ku e Sekretario General di Nashonnan Uni (SGVN), sr. António Gutteres.

 

Durante di e AVVN 76 den sèptèmber 2021 e SGVN a bai di akuerdo ku un proposishon di parti di Promé Minister Mark Rutte, pa tene un reunion ku e 4 Promé Ministernan di Reino.

 

Durante di e reunion a papia entre otro tokante e situashon na Venezuela, i ku mester bin un solushon pa ku e krisis humanitario, migratorio i ekonómiko.

 

Promé Minister Gilmar Pisas a indiká ku komunidat internashonal tambe mester tene kuenta ku Kòrsou i e otro islanan den region komo nos ta “Small Island Developing States” òf SIDS.

Nos islanan ta chikí e tin mester di yudansa den forma di fondo pa ku nos desaroyo, pero tambe asistensia tékniko i “capacity building” (kreashon di kapasidat).

 

Sekretario General Guterres tin hopi atenshon pa islanan chikí den nos region i ta hopi preokupá pa nos debí na e krisis di klima, pandemia i e situashon di Venezuela ku nos ta eksperensiando aktualmente.

E la bisa ku e lo keda trese esaki dilanti, manera el a hasi durante e Asemblea General di Nashonnan Uní na sèptèmber 2021, pa asina otro paisnan por tene kuenta ku nos.

 

Na final di e reunion Promé Minister Gilmar Pisas a ekspresá ku e ta spera di por keda traha riba e puntonan aki, i tambe otro puntonan, ku Nashonnan Uní den futuro.

 

E kombersashon a kana den un bon esfera.