Prome Minister Evelyn Wever-Croes: CONSEHO DI MINISTER DI REINO: ARUBA Y HULANDA A YEGA NA OTRO RIBA 2 DI E 3 PUNTONAN HULANDA NO KIER PA STOP RECORTE DI SALARIO

 

Prome Minister Evelyn Wever-Croes:

 

CONSEHO DI MINISTER DI REINO: ARUBA Y HULANDA A YEGA NA OTRO RIBA 2 DI E 3 PUNTONAN

HULANDA NO KIER PA STOP RECORTE DI SALARIO

 

Awe mainta a tuma lugar e reunion di Conseho di Minister di Reino na Den Haag. 

Aruba y Hulanda a yega na acuerdo riba 2 di e 3 puntonan cu na december a keda habri. Riba e Coho (Nota di Cambio) y e prolongacion di e protocol, tin acuerdo pero no riba e 12.6%. 

Conseho di Minister di Reino a nenga e peticion di Aruba pa stop e recorte. Nan no ta haya cu awor ainda ta oportuno pa aproba e peticion cu Gobierno di Aruba a haci pa stop e recorte, en todo caso tanten cu Aruba ta depende di sosten di likides. 

Pues ainda no tin un acuerdo riba e topico aki y a palabra cu lo sigui delibera e dianan siguiente.

 

SOSTEN DI LIKIDES 

Pa loke ta trata e peticion di Aruba pa sosten di likides pa e prome kwartal di 2022, esaki lo ta riba agenda di e siguiente reunion di Conseho di Minister di Reino aki 3 siman. 

 

Gobierno di Aruba ta satisfecho cu a logra acuerdonan riba 2 di e 3 puntonan, y cu e sosten di likides por wordo aproba den e sigiente reunion. Pero ta lamenta cu no a yega na acuerdo ainda tocante e recorte di salario. Gobierno lo sigui den deliberacion cu Hulanda, y mientrastanto lo sigui dialogo cu sindicatonan.