E guera Ruso kontra Ukraina tin konsekuensia pa nos tambe.

 

E guera Ruso kontra Ukraina tin konsekuensia pa nos tambe.

E guera i sankshonnan di Union Europeo i Merka kontra Rusia ta mishi direktamente ku ekonomia i bienestar di Kòrsou

Preis di gas i krudo lo siguí subi pa hinter mundu. Preis di koriente i awa lo subi aki na Kòrsou  i preis di tur otro produkto i servisio lo subi, meskos ku n’e preis di flete mundial pa trese kuminda lo siguí subi. Kemen preis di kuminda tambe ta subi ainda mas.

Inflashon mundial i na Kòrsou, tambe lo siguí kresé. Pegunta ta, kon mundu lo reakshoná segun tempu ta bai, esta lo keda ku e sankshonnan ekonomiko di Merka i Union Europeo so? Anto ki konsekuensianan e sankshonnan aki tin pa nos?

Venezuela i Rusia tin akuerdonan huntu, esaki por trese e guera fisikamente mas serka di Kòrsou? Merka lo akseptá ?

Kiko e menasa di presidente Putin, presidente di Rusia, ku e palabranan ‘ku otro paisnan entremeté lo tin konsekuensia nunka bisto pa mundu’ ke men? Presidente Putin ta dispuesto pa hasi uso di armanan nuklear?

Despues di Ukraina, kua pais mas Rusia lo ke aneksá? Tur e paisnan ku antes tabata forma parti di Union Sovietiko? Anto e ora ei, sobra di mundu por siguí para un banda militarmente? Mundu por haña nos mes ku un terser guera mundial?  Nos por imaginá nos kiko un guera asina ta trese ku ne? E guera lo sprei bai direkshon di Merka?

Nos sa ku ekonomia mundial ta hopi suak komo konsekuensha di Covid. Esaki por bira e un golpe mas hopi grandi ainda pa ekonomia mundial. Gobièrnu mester paga tinu riba maneho di nos país pa e por tene kuenta ku e konsekuensianan pa Kòrsou i esei ta sin ku tin sigur, ku proksimo invierno lo por tin  otro variantenan di Covid atrobe.

PIN ke pidi atenshon pa lo siguiente.

  1. Kiko ta e pasonan di gobièrnu ku Kòrsou a tuma òf ta bai tuma pa menguá e konsekuensianan di e guera aki pa nos?
  2. Kon ta pará ku desaroyo di seguridat di nos mes alimentashon, kemen kiko gobièrnu ta hasi pa stimulá agrikultura?
  3. Kiko ta e impakto kalkulá ku e gera lo tin riba nos turismo, a konsekuensia di preisnan haltu di petróleo i destabilisashon di Oropa?
  4. Kon ta para ku kreá fuentenan nobo pa entrada di pais manera e proyekto di kanabis i e-gaming?
  5. Ki trayekto gobièrnu ta kana pa train nos hendenan pa kuponan di trabou ku ta bin liber?
  6. Ki trayekto gobièrnu a prepará pa sostené e hendenan más vulnerabel ku lo no por apsorbá e subida explosivo di preis ku nos por antisipá?
  7. Gobièrnu prepará Curoil i Aqualectra riba e subida di preis?
  8. Gobièrnu a kòrda Hulanda riba su obligashon pa defendé nos integridat teritorial konsiderando nos posishon strategiko i partnernan Ruso den bisendario?
  9. Hulanda ta kòrda informá i envolví nos di adelantá den desishonnan di gobièrnu Hulandes pa partisipá den sankshonnan di Union Europea ya ku nan por tin konsekuensha direkto pa nos?
  10. Kiko ta posishon di gobiernu riba e medidanan Europeo?

Esakinan ta dis algun di hopi pregunta riba áreanan di maneho ku nos Gobièrnu mester prepará riba dje i informá nos komunidat di dje.

Share this page to Telegram

This site uses Akismet to reduce spam. Learn how your comment data is processed.

%d bloggers like this: