PIN ta kontentu: kanabis den Parlamento Por fin lo trata lei pa lanta industria di produkshon di kanabis medisinal

 

PIN ta kontentu: kanabis den Parlamento

Por fin lo trata lei pa lanta industria di produkshon di kanabis medisinal

 

 

Willemstad — Ku satisfakshon PIN a nota ku Partido KEM, ku sosten di otro nan den oposishon, a pidi un reunion pa legalisá produkshon lokal di kanabis medisinal. E legalisashon ta enserá entre otro  adaptashon di lei di opio i institushon di un outoridat sentral pa regulá e sektor.

Ku e sektor aki, segun kalkulashon di Ministerio di Ekonomia, tin oportunidat riba kasi 9 mil kupo di trabou nobo, kasi 300 mion florin di ingreso èkstra pa gobièrnu i algu mas ku 4 prosent di kresementu ekonómiko.

Awor ta na presidente di Parlamento pa yama gabinete Pisas bin splika representantenan di pueblo si e ke kresementu ekonómiko, si òf no. Si e ke pa Kòrsou para riba su mes pia, si òf no

 

Splikashon

Awe tin un diskushon riba para riba nos mes pia di moda ku por rechasá COHO. Sinembargo muchu mas promé ku landspakket, CHE i COHO a aparesé na horizonte, Partido PIN ya a traha riba e posibilidat ekonómiko enorme ku kanabis medisinal ta brinda. Ta dje manera ei Kòrsou por hasi su ekonomia sufisiente fuerte pa enfrentá retonan aktual i di futuro.

 

P’esei, banda di tur pregunta riba kontenido di e kambionan rekerí, PIN ta urgi representantenan di pueblo pa puntra Gobièrnu Pisas tambe pa splika dikon si ‘rekuperashon’ ta sentral den su programa di gobernashon, e no a bin Parlamento di su mes ku kanabis medisinal, sabiendo e potensial ekonómiko enorme ku e sektor aki tin.

 

Kòrsou kompleto ta keda pendiente di presidente di parlamento su  konvokashon.