Prome Minister Evelyn Wever-Croes: ENCUENTRO INFORMATIVO CU STUDIANTENAN DI IPA

 

 

Prome Minister Evelyn Wever-Croes:

ENCUENTRO INFORMATIVO CU STUDIANTENAN DI IPA

 

Dialuna mainta, Gobierno a ricibi bishita di IPA incluyendo e ‘exchange students cu ta na Aruba. Na e ocacion, Gobierno a brinda informacion na e grupo di hoben cu a mustra hopi interes den haya mas tanto informacion posibel. Normalmente, e encuentro aki ta tuma luga tur aña pero door di Covid a haci esaki dos biaha virtual. Prome Minister a expresa di ta contento cu e biaha aki un biaha mas, por a ricibi e studiantenan den persona atrobe cu ta haci e encuentro hopi mas agradabel. Prome Minister Evelyn Wever-Croes, Minister Endy Croes y Minister Geoffrey Wever a hiba palabra durante e encuentro.

 

Prome Minister a duna informacion di gobernacion en general, con e ta hinca den otro y kico ta e retonan cu Gobierno ta enfrenta. Riba e tema di Covid a haya hopi pregunta y a rekiri hopi informacion y splicacion tambe di parti di Prome Minister especialmente tambe riba con Aruba ta bay recupera y reconstrui despues di e pandemia.

 

E studiantenan tabata tin hopi pregunta tambe riba e relacion cu Reino y e fiansanan cu Aruba a haya di Hulanda. Tambe riba medio ambiente hopi pregunta a wordo haci.

 

“Nos a comparti cu nan e vision di Gobierno. Nan ta bishita Gobierno y Parlamento tur aña durante nan estudio. Esaki sigur ta un oportunidad unico pa nos comparti e vision y tur locual cu nos ta hacienda den gobernacion pa Aruba”, Prome Minister a duna di conoce.