Minister Boekhoudt presente na firmamentu ku ta impulsá projekto ‘Na Kas’
Salubridat Públiko, Medio Ambiente i Naturalesa
Minister Boekhoudt presente na firmamentu ku ta impulsá projekto ‘Na Kas’
Publiká riba 21 Aprel 2026
WILLEMSTAD – Riba 20 di april 2026 a tuma luga den edifisio di SVB e firmamentu di e karta di garantia I finansamentu pa projekto “Na Kas/ kaya Aron”, e firmamentu a tuma luga entre gerensia di SGR-Groep, gerensia di SVB, RBC-Bank I den presensia di Minister di GMN sr. T. Boekhoudt. Ku e firmamentu SVB a kompromete su mes pa para garantia pa projekto ‘Na Kas” I tambe SVB lo duna SGR- groep un adelanto finansiero di Cg. 2 miyon pa inisia e projekto kual lo wordu finansia dor di RBC- Bank.
Projekto “Na Kas” a kuminsa riba inisiativa di ex Minister di GMN sr. J. Silvaniata i aktual Minister di GMN sr. T. Boekhoudt a tuma bou di su enkargo pa finalisa e projekto. Projekto “ Na Kas” ta bai ta un rekonstrukshon di bibienda pa kliente nan di SGR- groep na kaya Aron den bario di Abrahamz, konsistiendo di 5 kas pa 24 kliente ku desabilidat mental i 6 kliente ku ta diagnostika ku desabilidat mental kombina ku autismo severo.
Ku finansamentu di e projekto aki tantu Gobiernu di Korsou, SVB i SGR- groep kier mustra ku huntu den kolaborashon i un bon vishon nos por halsa e kalidat di kuido na Korsou.
drpd sr. F. van Lamoen (manager AVBZ), sr. O. dos Santos (relatie manager RBC) sra. C. Emerenciana( direktor SGR- groep) Minister T. Boekhoudt, sra L. Cijnte-Gout (direktor suplente SGR-Groep), sr. F. Simon (direktor SVB)
