Declaracion di Minister Ursell Arends: Aruba a cuminsa aplica sanccionnan

 

Declaracion di Minister Ursell Arends: Aruba a cuminsa aplica sanccionnan

Mi encargo como minister di transporte ta inclui luchtvaart y mi ta ser manteni na altura diariamente door di Directie Luchtvaart di e efectonan cu e agresion militar di Rusia contra di Ukraina tin pa Aruba.

Manera ta conoci, varios pais – entre otro Merca, Reino Unido y Union Europeo – a emiti sanccionnan en conexion cu e situacion aki. E sanccionan aki ta regarda diferente area; financiero, maritimo, diplomatico pero tambe pa loke ta aviacion. Na Aruba, mescos cu otro paisnan, ta evaluando e aplicabilidad di cada sanccion y ta integrando esaki den nos leynan. Esaki a base di e sanccionnan di Union Europeo, cu Aruba ta siguiendo.

A base di esaki a tuma e paso pa cera espacio aereo pa tur avion cu ta propiedad di of cu ta wordo dirigi pa un persona of compania Ruso.

Ademas di esey, Directie Luchtvaart a cuminsa tambe cu implementacion di e sancionnan y a cuminsa aplica esaki riba un total di 7 avion. Esaki ta encera de-registro of grounding di e avion, dependiendo di e sanccion.

Comunidad di Aruba por ta sigur cu hunto cu Directie Luchtvaart mi lo sigui monitorea e sanccionnan di cerca. E sanccionnan ta wordo adapta regularmente, y nos lo percura pa Aruba aplica esakinan debidamente.