FUNDASHON PRO SOUAX ku proyekto ”NOS TA SAKA MAN PA ABO POR LORA MAN”

FUNDASHON PRO SOUAX ku proyekto
”NOS TA SAKA MAN PA ABO POR LORA MAN”

Den kuadro di Fundashon Pro Souax (FPS) su meta pa yuda promové bienestar di e habitantenan di bario di Souax i bisindario, FPS ta realisá riba un base kontinuo proyektonan entre otro di karakter edukativo pa duna informashon i formashon i asina empoderá habitanenan. Pa sirkumstansianan konosí, aktualmente tin den nos komunidat un nesesidat grandi pa sea hasi algu pa garantisá entrada òf pa hasi algu èkstra pa haña algu mas di entrada. Relashoná ku e nesesidat aki FPS ta inisiá próksimamente e proyekto ”NOS TA SAKA MAN PA ABO POR LORA MAN”. Ta trata di un proyekto kaminda FPS huntu ku profeshonalnan lokal ta duna bèk na komunidat dor di kompartí ku interesadonan konosementu i eksperensia. Den e proyekto aki e interesado tin e oportunidat pa haña (in)formashon pa sea start un negoshi di lora man òf pa mehorá aspektonan di su negoshi di lora man. E informashon por ta entre otro pa medio di kurso, charla, konseho òf guia pa ku un proyekto di lora man. E promé aktividat di e proyekto ”NOS TA SAKA MAN PA ABO POR LORA MAN” ta un kurso pa interesado di 17 aña pariba, pa siña traha algun tipo di bolo, snèks i kos dushi i ta kuminsá djaweps 14 di aprel próksimo na Sentro di bario Souax. E kurso ta na enkargo di sra Aiditha Servilia – Verplaats konosido profeshonal ku años di eksperensa den e ramo aki. i lo dura 4 siman. Material i ingredientenan pa e kurso ta opsekio di sra Servilia i inskripshon ta solamente fls.5.00 pa persona. Na final di e kurso partisipantenan ta risibí un sertifikado. Pa inskripshon òf pa mas informashon yama/app 522-8170 / 868-8170 òf mail na fundashonprosouax@gmail.com Lugánan ta limitá pues no tarda pa inskribí.

FUNDASHON PRO SOUAX i Profeshonalnan lokal ta duna bèk ku e proyekto
”NOS TA SAKA MAN PA ABO POR LORA MAN”

Kurso : Traha bolo, snèks i kos dushi
Instruktor: Sra. Aiditha Servilia – Verplaats
Durashon: 1 luna largu, 1x pa siman, di 18.00 pa 20.00
Fecha: djaweps 14, 21, 28 aprel / 5 mei 2022
Lugá: Sentro di bario Souax
Partisipashon: Inskripshon 5.00 p.p. / Material i artíkulo di lès: grátis