Minister Maduro a presencia e resultado di e tayer ‘Equivocal’ na Atelier 89

Minister Maduro a presencia e resultado di e tayer ‘Equivocal’ na Atelier 89

 

ORANJESTAD – Minister Maduro di Cultura a bishita Atelier 89 Punto di Beyas Arte Aruba pa mira e resultado di e tayer di video experimental ‘Equivocal’ duna pa e artista Silvia Martes. Un bunita anochi yena cu e talento di nos hobennan bou auspicio di e artista Elvis López. Pa 4 siman largo e hobennan a haya oportunidad di siña con pa traha script, filma y edita nan propio pelicula cortico y diabierna anochi nan a presenta e resultado na e publico presente.

 

Na final di e presentacion, Minister Maduro a haya un recorido y splicacion di Sr. Elvis Lopez di e obranan di arte cu por ser admira den e studionan di Atelier 89. Ta trata di obranan cu a keda traha durante di e diferente tayernan cu ta wordo ofreci pa Atelier 89. Un exposicion bunita cu ta bale la pena pa pasa bishita y admira.

 

Minister Maduro ta felicita tur hoben artista cu a presenta nan bunita creacion di arte audio-visual den e presentacion ‘Equivocal’ y ta gradici Sra. Silvia Martes pa a amplia e conocemento y inspira nos hobennan pa sigui desaroya nan talento y creatividad. Masha danki tambe na Elvis Lopez y e team dinamico di Atelier 89 pa e esfuerso continuo pa duna arte su atencion debido y lugar mereci den nos comunidad.