ENKUENTRO I FIRMAMENTUNAN  KU A SIGUI TUMA LUGÁ NA DUBAI

ENKUENTRO I FIRMAMENTUNAN  KU A SIGUI TUMA LUGÁ NA DUBAI


Willemstad – E delegashon di Gobièrnu di Kòrsou a sigui ku e siguiente enkuentro i firmamentunan bou di guia di Promé Minister Gilmar Pisas i huntu ku Minister di Desaroyo Ekonómiko Ruisandro Cijntje dia 28 di mart 2022.


A kuminsá e dia ku un reunion na World Freezone Organization (WFZO).

Akinan Curinde N.V. a firma un akuerdo di entendimentu (MOU) ku WFZO na Dubai. 

E delegashon di Kòrsou a risibí un presentashon hopi impreshonante promé i despues a firma e MOU. Esnan ku a firma tabata sra. Jacqueline Jansen (Direktor di Curinde N.V.) i Dr. Samir Hamrouni (CEO WFZO).

WFZO ta un organisashon ku tin mas di 3000 afiliado rònt mundu i nan ta yuda nan miembronan pa mehorá nan aktividatnan, kompetensia sano, regulashonan transparente i étika di negoshi, apliká téknologia i inovashon.

 

E puntonan ku mas a resaltá den e MOU ta entre otro ku:

  • Curinde N.V. lo ta e punto di kontakto nashonal di WFZO na Kórsou;
  • WFZO lo konsehá Curinde N.V. riba oportunidatnan di outomatisashon i robotisashon di prosesonan logístiko i industrial;
  • Lo kontinuá e promoshon di aktividatnan den Karibe i bou di klientenan di Curinde N.V. i demas empresarionan lokal ku por brinda oportunidatnan tantu pa Kòrsou komo otro paisnan den region.

 

Pa Dr. Hamrouni tabata un plaser di por a risibí e delegashon di Kòrsou den nan ofisina prinsipal na Dubai i e la invitá Promé Minister sr. Pisas pa ta presente na e “Annual International Conference & Exhibition (AICE) 2022” ku lo bai tuma lugá na Jamaica den luna di yüni 2022, na kual lo bai tin partisipashon aktivo di Kòrsou.

 

Despues a sigui ku un reunion na DP World. 

DP World a keda representá pa sr. Simon Sonoo (Vice President International Parks & Economic Zones). 

DP World ta para pa Dubai Port. E Haf di Dubai aki a ekspandé i ta aktivo komo un multinashonal rònt mundo. DP World a duna un splikashon amplio di tur loke nan ta ofresé i a mustra hopi interes pa ekplorá oportunidatnan na Kòrsou. Nan ta aktivo den Karibe kaba i ta konstruyendo un Haf na Repúblika di Sürnam. Tin hopi oportunidat pa nos por posishoná nos mes komo un niche den Karibe. 

A palabrá ku e kombersashonnan lo sigui den e próksimo dianan. Promé Minister a Gilmar Pisas invitá e team di DP World pa hasi un bishita eksploratorio na Kòrsou.

 

A sigui mesora ku un reunion ku DMCC. 

DMCC ta para pa Dubai Multi Commodities Center. E kompania aki a keda establesé dn 2002 pa e Gobièrnu di Dubai pa proporshoná infrastruktura físika, di merkado i finansiero, pa establesé un “hub for global commodities trade”.

Promé Minister Gilmar Pisas huntu ku Minister di Desaroyo Ekonómiko Ruisandro Cijntje, na nòmber di Gobièrnu di Kòrsou, a firma un akuerdo di entendimentu ku sr. Ahmed bin Sultan bin Sulayem (Executive Chairman & Chief Executive Officer of DMCC).

Den e akuerdo di entendimento e partidonan a tuma e desishon pa eksplorá oportunidatnan pa koperashon empresarial. 

 

Promé Minister a sigui ku un bishita serka “His Excellency” Sheikh Nahayan Mobarak Al Nahayan, kende ta Minister di Toleransia na Dubai. E ta konsiderá komo un “ruler” na Dubai. E kombersashon tabata unu hopi interesante kaminda HH Sheikh Nahyan bin Mubarah al Nayhyan a kompartí diferente informashon tokante nan historia ku Promé Minister Pisas i alabes a duna Promé Minister Pisas algun idea i konseho hopi balioso.

http://www.tolerance.gov.ae/en/about-his-highness-minister-of-tolerance.aspx

 

Despues Promé Minister Pisas a sigui ku un sita serka “Her Excellency” Reem Ebrahim Al Hashimy (Minister of State for International Cooperation). E minister aki ta esun ku ta responsabel pa i ta organisá e Expo 2020 Dubai entre otro. 

“Her Excellency” Reem Ebrahim Al Hashimy a kompartí ku Promé Minister Pisas diferente informashon riba entre otro nan kultura, kon nan ta uni i traha ku diferente otro hende di diferente otro nashonalidat, pa por logra nan metanan. E punto kardinal serka nan ta pa kompartí enseñansa, rikesa i konosementu ku otro.

E la ofresé Promé Minister Pisas tur klase di koperashon i sosten espeshalmente riba e áreanan di kompartí konosementu, edukashon i eksperensia. E la pidi Promé Miniser Pisas pa laga nos ban traha huntu riba e diferente áreanan i pa Promé Minister Pisas sigui tene kontakto ku su persona na momentu ku esaki ta deseabel.

E kombersashon tabata unu hopi ameno i habrí.

https://www.mofaic.gov.ae/en/the-ministry/the-ministers/uae-minister-of-state-for-international-cooperation/minister-of-the-state-for-international-cooperation

 

Durante di e bishitanan ku Promé Minister Gilmar Pisas tabatin ku e dos ekselensianan, Minister di Desaroyo Ekonómiko Ruisandro Cijntje a risibí un presentashon hopi interesante serka sr. Edwin Lammers, un speshalista riba Zonanan Ekonómiko na Dubai.

Durante di e presentashon aki Minister di Desaroyo Ekonómiko sr. Cijntje a keda kontentu ku e oportunidat ku e la haña pa por a profundisá su mes hopi mas den e área di Zona Franka. 

 

Despues Minister di Desaroyo Ekonómiko sr. Cijntje a bishitá e Zona Franka Finansiero (Dubai International Financial Center (DIFC). 

E la keda risibí pa Alya Al Zamouni (Executive Vice President Operations ) i Narayanan Sambasivan (Head Risk & Compliance Amicorp). 

Akinan Minister di Desaroyo Ekonómiko sr. Cijntje a risibí hopi informashon pa ku kon por diversifiká den e área di Zona Franka i krea ekosistemanan pa atrae invershonistanan ku ke bin establesé i operá den e Zona Franka na Kòrsou. Despues di e sitanan e por konfirmá ku lo bai tin hopi desaroyonan interesante den tapara.

 

A sigui ku un sita na DCTCM, kual ta para pa Dubai Corporation for Tourism and Commerce Marketing: https://dubaiaccessibletourism.com/dubai-corporation-for-tourism-and-commerce-marketing/

E delegashon a risibí un presentashon basta inspirativo di parti di sr. Issam Abdulrahim Abdulla Kazim (CEO DCTCM).  Den e presentashon a duna un splikashon masha amplio riba kon Dubai ta desaroyá nan Turísmo stratégikamente i dikon nan ta asina èksitoso komo destinashon turístiko. 

A informá e delegashon ku 80% di Dubai su Turísmo ta pa “leisure” i 20% ta negoshi. Nan Gobièrnu i sektor Privá ta traha hopi bon ku otro, kaminda Gobièrnu ta liderá e desaroyo i fasilitá e invershonistanan. 

A yega mesora na un akuerdo entre Minister di Desaroyo Ekonómiko Ruisandro Cijntje i e Departamentu di Ekonomia i Turísmo. 

E Departamentu di Turísmo lo duna sostén pa yuda kapasitá nos hendenan den e kadena di Turísmo, pa asina nos ta aun mas efektivo den nos esfuersonan pa krese Kòrsou su Turísmo. 

 

E dia tabata unu kargá ku diferente sita i alabes unu hopi fruktífero mirando tur akuerdonan ku a yega na dje.

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: