Nombramentu di Drs. Nihayra Leona komo director-ehekutivo nobo di FSHP

Nombramentu di Drs. Nihayra Leona komo director-ehekutivo nobo di FSHP

Willemstad – Resientemente direktiva di skolnan humanista na Kòrsou a nombra sra. drs. Nihayra Leona komo direktor di Fundashon pa Skol Humanista na Papiamentu (FSHP). Sra. Leona ta sikólogo di mucha ku spesialisashon riba tereno di enseñansa, idioma i multilingualismo. En konekshon ku su tésis dóktoral, ku e lo presentá pronto na Universidat di Amsterdam, el a investigá desaroyo di dominio di hulandes i ingles serka un grupo grandi di alumno den enseñansa regular na Hulanda. Banda di su investigashon doctoral el a sigui durante un período di kuater aña e desaroyo di papiamentu, hulandes i ingles di alumnonan di HAVO/VWO di enseñansa bilingual di SKAIH Pre-universitario i Albert Schweitzer HAVO/VWO pa medio di un beka di Sylvia W. de Groot Fonds. Ta den kuadro di e investigashon aki el a siña konosé e skolnan di FSHP mas di aserka.

Te ku resientemente, sra. Leona tabata presidente di e seshon Papiamentu di e asosiashon di dosente “Levende Talen” na Hulanda. Pa motibu di su preparashon akadémiko amplio, su eksperensia i konosementu riba tereno di idioma, su apresio pa nos idioma papiamentu, i su afinidat ku filosofia humanista, direktiva di FSHP ta konvensí di a enkontrá e persona adekuá pa sigui ku e trabou edukashonal ku Prof. Frank Martinus Arion a kuminsá. Sra. Leona ta komprondé e retonan ku nos idioma Papiamentu, nos fundashon i su skolnan ta enfrentá i no opstante ta balorá e posibilidatnan ku FSHP su skolnan ta brinda na nos muchanan.

Nombramentu di sra. Leona ta forma parti di un trayekto dirigí riba fortifikashon, renobashon i rehubenesimentu di FSHP riba diferente nivel. Esaki ta enserá aplikashon di un modelo nobo basá riba kódigo di bon gobernashon edukashonal, formá pa un (Konseho di) Direktiva i un Konseho di Supervishon. Meta di esaki ta oumentá efisiensia i efektividat di FSHP komo organisashon. Den e modelo nobo aki sra. Leona lo fungi komo direktor-ehekutivo banda di e timnan di maneho di Kolegio Erasmo, SKAIH VSBO/AGO i SKAIH Pre-Universitario. E lo duna direkshon na FSHP su skolnan inkluso edukashon preskolar.

Sra. Leona: “Tin mas ku sufisiente sosten sientífiko pa e efektonan positivo ku enseñansa den idioma materno por tin pa un mucha su desaroyo personal, kognitivo i edukashonal. Pa ami ta un honor di por kontribuí na desaroyo i fortifikashon di e kalidat di enseñansa na papiamentu. Pa logra esaki mi ta haña sumamente importante pa traha di un forma strukturá i sientífiko, hasi uso di konosementu ku ya otronan a kolektá i tambe modernisá. Mundialmente nos ta un di e tiki lugánan ku a logra di entrodusí i mantené enseñansa den un idiomo krioyo. Laga nos balorá esaki i sigui aportá na desaroyo di enseñansa na papiamentu, pa tur nos muchanan. Ta di e forma aki so nos por hasi uso máksimo di nos kapital multilingual.”