Prome Minister Evelyn Wever-Croes: MARILYNN HERMANS TA ENTREGA RESULTADO DI INVESTIGACION RIBA E PROCESO DI OTORGAMENTO DI TERENO NA PROME MINISTER

Prome Minister Evelyn Wever-Croes:

MARILYNN HERMANS TA ENTREGA RESULTADO DI INVESTIGACION RIBA E PROCESO DI OTORGAMENTO DI TERENO NA PROME MINISTER

 

Siman pasa, Prome Minister Evelyn Wever-Croes a ricibi for di man di e hoben studiante di OGM na Universidad di Aruba, Marilynn Hermans, e resultado di su investigacion riba e proceso di otorgamento di tereno. Den cuadro di su studio, Marilynn mester a haci un investigacion di e proceso y el a duna recomendacion di con esaki por wordo mehora.

 

No ta un secreto cu e proceso di otorgamento di tereno ta uno hopi complica y riba dje tin hopi atraso. Loke ta complica e materia mas ta tur e investigacionnan penal cu tin di corupcion cu tereno di gobierno den e ultimo añanan.

 

E resultado di e estudionan di Marilynn Hermans sigur ta sumamente valioso y lo wordo tuma den consideracion den e cambionan cu mester bin den e proceso actual pasobra e meta di Gobierno di Aruba ta pa tin procesonan cu ta cana lihe y cu ta eficiente y transparente y husto. E realidad ta cu no tin hopi tereno disponibel na Aruba pero loke tin mester wordo parti lo mas lihe posibel pa tur famia por yega na un cas y hogar di nan mes.

 

Minister President ta gradici Marilynn Hermans pa su dedicacion na e estudio cu el a haci y a sigur’e cu e recomendacionnan lo wordo sigui. Pabien Marilynn cu danki pa e estudio importante y valioso aki.

Share this page to Telegram

This site uses Akismet to reduce spam. Learn how your comment data is processed.

%d bloggers like this: