Minister Dangui Oduber ARUBA TOURISM AUTHORITY A HACI ENTREGA DI CUENTA ANUAL 2021 DEN E TEMPO STIPULA

ORANJESTAD – Diaranzon merdia Minister di Turismo y Salud Publico sr. Dangui Oduber a reuni cu directora di Aruba Tourism Authority (ATA) Sra. Ronella Croes, hunto cu management y board di ATA. Presente tawata tey CFO sr. Van Drie, CMO sra. Luidens y CCO sra. Escalona di ATA y miembronan di board sr. Quant, sr. Najjar y sra. La Sorte. Durante e encuentro a entrega e cuenta anual di ATA pa aña 2021. E cuenta anual a wordo entrega dentro di e tempo stipula pa ley.

Aña 2021 no tabata un aña facil pa Aruba, caminda pa varios luna Aruba a wordo afecta pa cifranan halto di covid19. No obstante e reto nan cu aña 2021 a trece cune pa nos turismo y economia, ATA tawata tin un resultado sublime, unda a registra un resultado neto di AFL. 24 miyon. Conforme e ley di ATA henter e resultado netto ta bai pa gobierno y sigur ta yuda cu e posicion financiero di Gobierno.

Minister Oduber a splica di e strategia cu a wordo hiba den 2021, esaki tawata uno dirigi pa e recuperacion di Aruba su turismo. Awe por conclui cu aña 2021 tawata un bon aña di recuperacion, unda e entradanan a yega casi e nivelnan cu a wordo proyecta pa ATA.

Minister Dangui Oduber ta hopi contento, satisfecho y orguyoso di e trabounan cu ministerio di turismo y ATA a bin ta haciendo pa cu Aruba su turismo. Danki na e trabou di cada uno cu ta elabora na ATA, un danki na e management team y tambe e board pa tur e trabounan cu a wordo haci durante un aña dificil. No por lubida pa gradici tur partners den e sector di turismo. Danki na AAA, APA, AHATA, ATSA, Aruba Vacation Rental y tur otro partner di gobierno pa e resultado aki.

Danki pa e bunita resultado cu a wordo presenta por medio di e cuenta anual 2021.