Aqualectra a haña kousa i ta solushonando e situashon

KORTO SIRKUITO KOMPLIKÁ TABATA KOUSA DI INTERUPSHON DEN SUMINISTRO DI KORIENTE NA UN GRAN KANTIDAT DI BARIO DJABIÈRNÈ ATARDI KWE ANOCHI

Willemstad 17 di Mei 2022- Djabièrnè dia 13 di Mei último, Aqualectra a eksperenshá un fayo den su ret di distribushon ku tabata mas kompliká ku sa ta e kaso, kual a kousa interupshon den un kantidat di bario i a dura mas ku normalmente sa tuma téknikonan di Aqualectra pa resolvé e tipo di interupshonnan aki. Ta asina ku djabièrnè último pa banda di kuartu pa 4’or di atardi a surgi un korto sirkuito riba un kabel ku ta suministrá koriente na barionan di Jongbloed, Toni Koenchi, Mahaai, Cas Cora i besindario. Normalmente den un kaso similar, Aqualectra ta investigá e kousa i via di otro sirkuito ta suministrá e area ku koriente te na momento ku por logra drecha e kabel ku a kousa e korto sirkuito. Den e kaso di e interupshon di djabièrnè último, téknikonan di Aqualectra a intentá na hasi meskos, pero a bin ripará ku tin mas kabel defekto. Esaki, miéntras ku promé ku e interupshon original a surgi, e kabelnan aki tabata den servisio normal. A konkluí na e momentunan ei ku lo tabatin mas kabel ku a kibra na momentu ku e interupshon a surgi. A base di e konklushon ku mas kabel lo a kibra kasi simultaniamente den e area, mester a tuma e úniko alternativa posibel, kual tabata pa midi tur kabel unu pa unu pa determiná si tabatin mas kabel kibrá.

E proseso aki a tuma su tempu debí na e echo ku na mes momento tabatin un total di 4 kabel kibrá den un lapso di tempu masha kòrtiku. Mester a midi i verifiká kua kabel tabata defekto i kua por a funshoná na un manera konfiabel, pa finalmente por a suministrá koriente na henter e area atrobe. E proseso aki a pone ku ta te mitar di 2 den oranan di mardugá e último area a haña koriente bèk.

Miéntras ku téknikonan di Aqualectra tabata atendé ku e interupshon den e area di Jongbloed, Cas Cora, Toni Koenchi, Mahaai i besindario, a surgi otro korto sirkuito den area di Zona Liber (Nieuwe Haven).

Na promé instante a pensa ku e interupshon aki lo por tabatin un relashon ku e interupshon den e otro area, pero esaki no tabata e kaso.

For di djadumingu último mes a drecha dos di e kabelnan prinsipal den area di Santa Rosaweg pa por garantisá kontinuidat di suministro den e area. Den e próksimo dianan Aqualectra lo kontinuá ku drechamentu di e otro kabelnan ku a kibra den e mesun area, i alabes lo drecha e kabel den area di Zona Liber (Nieuwe Haven) ku a kibra.

Aqualectra ta pidi su diskulpa na e habitantenan den e area pa e inkumbinensha kousá. Aqualectra lo sigui traha pa por garantisá un suministro kontinuo i konfiabel.