PERMIT PA MUSIKO I ARTISTANAN KUBANO BIN TRAHA NA KORSOU TA UN FALTA DI RESPET TOTAL PA NOS MUSIKO I ARTISTANAN LOKAL

WILLEMSTAD — Ku hopi asombro, Direktiva di Asosashon di Músiko i Artista di Kòrsou ( AMAK) a tuma nota ku Gobièrnu di Kòrsou pa medio di su Ministerionan di Hustisia i SOAW, a tuma un desishon inkorekto pa duna pèrmit di trabou na Músikonan i Artistanan Kubano.

Pa medio di e desishon aki, Gobièrnu di Kòrsou ta falta ku rèspèt pa nos músikonan i artistanan profeshonal lokal, ku por hasi e trabounan artístiko konserní mes un kos o mas mihó.

Funkshonarionan di e Ministerionan menshoná no a tuma ni e molèster pa konsultá ku direktiva di AMAK konforme dekreto Ministerial di 13 di febrüari 1976, firmá pa Minister mr.  Jackie Voges. Den e dekreto aki( athunto)  ta pará klaramente ku mester tuma konseho di AMAK pa lokual ta trata entrada di Músikonan estranhero aki na Kòrsou. Den e lei di Openbare Orde di 2015,  ta bolbe menshoná e funshon di AMAK pa lokual ta trata di músikonan estranhero na Kòrsou pa bin traha.

Den  “Richtlijnen de Ministerio di hustisia novèmber 2017 ( kopia athunto) ta bolbe trese e proseduranan ku mester sigui, dilanti.

Direktiva di AMAK ke urgi na tantu Ministernan i Ministerionan di Hustisia i di SOAW, pa wak den kuadro di leinan eksistente kon por remediá e fayo grandi aki.

AMAK ta konsiente ku nos mester di invershonnan den turismo, pero nunka esaki mester bai a todo kosto i es mas mester respetá leinan laboral di nos pais.

Direktiva di AMAK ke bolbe enfatisá ku e desishon aki ta un falta di rèspèt total pa nos músikonan i artistanan profeshonal lokal.

Direktiva di AMAK