Minister Javier Silvania Solushon alternativo pa konkretisá sosten di likides pa Selikor

WILLEMSTAD 30 di mei 2022 – Durante e reunion ku a tuma lugá riba di djaluna 30 di mei 2022 a amplia riba e palabrashonnan konkreto ku a keda hasí durante e reunion anterior ku a tuma lugá na aprel di e aña aki. Minister di Finansa Javier Silvania, minister di Salubridat, Medio-ambiente i Naturalesa Dorothy Pietersz-Janga, direktor di Selikor sr. Kook i gruponanan di trabou ku ta konsistí di e trahadónan di ministerio di Finansa, GMN, Selikor i sindikato BTG tabata presente durante e reunion aki.

Manera ya ta konosí, minister di Finansa a pone 20 mion disponibel komo sosten di likides pa Selikor. E montante aki ta bini for di e kolekshon di impuesto riba sushi, ku Aqualectra ta risibí i ta keda pagá den tranche. Esaki ta tuma lugá si Selikor kumpli ku e kondishonnan ku gobièrnu a stipulá. Den transkurso di siman ta bai pone atenshon pa konkretisá e pago di e promé tranche. E plan di aktividat ku mester a keda entregá dor di Selikor, tabata tin retraso ku a pone ku no por a finalisá e kalkulashon i aprobashon di e promé tranche manera palabrá. Minister Silvania a indiká ku el a entregá e “beslisdocument” kaba na Konseho di Minister, kual lo keda palabrá den e reunion di djárason próksimo. E minister a enfatisá ku e ta fasilitá den e proseso aki. “E desishon final ta den man di Konseho di Minister” asina minister Silvania ta splika.
Durante e reunion a papia prinsipalmente tokante e kondishon pa por brinda pueblo e oportunidat pa tira sushi 1 biaha pa siman grátis na Mal Pais (esaki no ta konta pa klientenan komersial). Esaki ta un punto doloroso pa Selikor i BTG. “Nos ta kompletamente dependiente di e entradanan di Mal Pais. Tur hende, inkluso Selikor mester paga pa tira sushi pasó nos no tin supsidio òf entrada alternativo”, Kook ta enfatisá. E sistema di registro aktual ta hasi posibel pa distinguí sushi personal i komersial. E kondishon aki ta pone e maneho di Mal Pais bou di hopi preshon. “Adaptashon di e sistema aktual ta bai tuma su tempu i p’esei ta importante pa nos wak bon si esaki ta benefisiá e situashon ku ya kaba ta hopi prekario”, Kook ta kontinuá.
Minister Silvania ta duna komo reakshon ku tin espasio pa bini ku alternativa pa e kondishon i seguidamente Kook ta presentá dos alternativa. (1) Subi e kantidat di kilo ku kasnan por stòrt na Mal Pais pa aña di 1000 kilo pa 2000 kilo. Di e manera aki no mester adaptá e sistema di registro i asina Selikor ta kumpli ku pueblo tambe. (2) Bini ku un momentu èkstra pa rekohé sushi gròf i di kurá pa e seis lunanan benidero. Di e manera aki no solamente nos barionan ta keda mas limpi, pero e ta skapa pueblo un kareda pa bai Mal Pais. E dos alternativanan aki a keda risibí positivamente dor di tur partido. Aunke e proposishonnan no ta spesifiká i konkretisá ainda, nan ta mustra aseptabel pa remplasá e kondishon aktual. E grupo di trabou ku ta responsabel pa e montante di e sosten di likides lo tene kuenta ku e alternativanan aki. Riba djamars 31 di mei lo presentá e proposishon di e suma di e promé tranche.

 

 

https://www.facebook.com/profile.php?id=100045700818054

This site uses Akismet to reduce spam. Learn how your comment data is processed.

%d bloggers like this: