Atletanan di landamentu sinkronisá ta saka kara di Kòrsou na Hulanda

Den Haag – Kuater atleta di e tim Swordfish Aquatic Group a sobresalí na Hulanda durante e kompetensia Synchro Beat ku a tuma lugá den Hofbad na Den Haag. Den e wikènt di 11 i 12 di yüni e atletanan Grace Borrebach, Delanny Almendariz Prieto, Ziva King i Gabrielle Johannes Maduro a logra kai den e final i konkistá diferente premio.

Dos luna pasa e atletanan a haña tende ku tin e oportunidat pa nan partisipá na e kompetensia na Hulanda di Koninklijke Nederlandse Zwembond (KNZB). Usando kontaktonan den reino a logra inskribí e atletanan pa e kompetensia ku por a konta tambe ku partisipashon di atletanan di hinter Hulanda i di Bèlgika.

Coachnan di Swordfish Aquatic Group a duna e oportunidat na e atletanan ku basá riba edat i prestashon por a kompetí den e arena internashonal. E kuater atletanan selekshoná tabata bon prepará ora nan a biaha pa Hulanda.

Durante e promé parti di e kompetensia na Den Haag e atletanan mester a demonstrá ku nan ta dominá e figuranan ku natashon artístiko ta eksigí. Ta solamente si nan a terminá den e promé 12 nan durante e kompetensia di figura, e atletanan por a sigui pa e final. Pa e kompetensia di Synchro Beat un kantidat di kasi 200 atleta a partisipá. Tur e kuater atletanan di kòrsou a terminá den e promé 12 nan.

Den e presentashon solo, Grace Borrebach a finalisá na di 5 luga. Den solo tambe Dellany Almendariz Prieto a finalisá na di 6 luga. Gabrielle Johannes Maduro, Dellany Almendariz Prieto i Ziva King (reserve)  a presentá komo dueto i finalisá na di dos puesto. Nan a trese medayanan di plata bèk Kòrsou.

Swordfish Aquatic Swimming ta sumamente orguyoso ku e kuater atletanan di Kòrsou. Ta felisitá Grace Boorebach, Delanny Almendariz Prieto, Ziva King i Gabrielle Johannes Maduro ku nan logro na Hulanda.