Pregunta na Minister di Desaroyo Ekonomiko

Presidente di Parlamento di Kòrsou

Señora Ch. America-Francisca

Wilhelminaplein # 4

PRESENTE

 

Willemstad, 9 di ougùstùs 2022

 

Tópiko: Petishon na Minister Cijntje pa aklarashon riba benta di Toubot ORCA

 

Señora America-Francisca,

 

Pa medio di e karta aki, hasiendo uso di artíkulo 96 di Reglamentu di órden di Parlamento, mi kier pidi bo persona pa dirigí e karta athunto na Minister di ekonomia, señor Ruisandro Cijntje.

 

Danki pa e koperashon.

 

Atentamente,

 

Ramón Yung

Parlamentario pa

frakshon di MFK

Minister di Ekonomia

Señor Ruisandro Cijntje
PRESENTE

Kòrsou, 9 di ougùstùs 2022

Tópiko: Petishon pa duna Parlamento klaridat riba benta di Toubot ORCA

 

Apresiabel señor Minister,

 

Ku asombro suskrito Ramón Yung miembro di Parlamento pa frakshon di MFK, den prensa a tuma nota ku supuestamente a bende e Toubot ORCA.

E informashon aki sigur tabata motibu di basta pregunta i kuestionamentu den komunidat. 

 

Segun informashonnan na alkanse di suskrito i di akuerdo ku informashonnan publiká den prensa, KTK na 2012 lo mester a kumpra e toubot ORCA pa un suma di alrededor di 30 i piku mion florin. E mesun fuentenan ta indiká ku a bende e toubot ORCA pa un suma di 3.6 mion florin.

 

Hustamente teniendo kuenta ku e informenan publiká i e kuestionamentu pa loke ta trata e tema aki den komunidat, ta suskrito su deber pa dirigí su mes na Minister Cijntje pa haña klaridat riba henter e proseso enkaminá pa KTK pa yega na benta dje toubot ORCA.

 

P’e motibu aki suskrito ta dirigí su mes na Minister Cijntje ku e siguiente preguntanan:

 

1. Minister por konfirmá ku KTK a bende e toubot ORCA?

 

1. Si e kontesta riba pregunta 1 ta afirmativo, kiko ta e motibu pa kual a yega na tal desishon?

 

1. Minister por informá Parlamento ki dia e proseso pa benta dje toubot ORCA a inisiá?

 

1. E hunta di komisario di KTK a aprobá benta dje toubot ORCA?

 

1. Si esei tabata e kaso, riba ki fecha e Hunta di Komisario a aprobá benta dje toubot ORCA?

 

1. Ken tur tabata e miembronan dje Hunta di Komisario ku a aprobá benta dje toubot ORCA?

 

1. Tin informashon disponibel for di kual por dedusí eksaktamente, kual ta e diferente partidonan politiko ku e komisarionan aki kada unu individualmente tabata representá?

 

1. Minister por informá Parlamento kiko ta e suma pa kual a bende e toubot ORCA?

 

1. Minister por informá Parlamento, kiko tabata e suma pa kual a kumpra e toubot ORCA?

 

1. Parlamento por disponé dje dokumentonan ku spesifikashon dje toubot ORCA na momento dje kompra?

 

1. Ora ku e toubot ORCA a yega Kòrsou, e toubot tabata kumpli ku tur e spesifikashonnan di akuerdo ku e dokumentonan di kompra?

 

1. E kompania KTK a laga hasi un evaluashon dje toubot ORCA, promé ku a realisá e benta?

 

1. Si esei tabata e kaso, Minister por pone e rapòrt di evaluashon òf taksashon aktualisá na disposishon di Parlamento?

 

1. Tin un spesifikashon òf rapòrt den kual Parlamento por mira kiko ta e motibu ku e toubot ORCA den 10 aña di tempu a pèrdè alrededor di 90% di su balor?

 

1. Tin otro kompania ku KTK a paga komishon di benta den e transakshon realisá?

 

1. Si esei tabata e kaso, Parlamento por disponé di informashon kua ta e kompania ku tabata enkargá ku benta dje toubot ORCA?

 

1. Tabatin debe riba e toubot ORCA kual ainda mester a dedusí for dje suma di plaka pa kual a bende e toubot ORCA?

 

1. Despues dje proseso di benta i pago pa e toubot ORCA, kuantu plaka KTK mes a risibí finalmente despues di e transakshon?

 

Sperando ku Minister lo kontesta nos karta ku preguntanan den e tempu definí den e protokòl firmá entre gobièrnu di Kòrsou i Parlamento, nos ta terminá ku un saludo kordial.

 

Atentamente,

 

Ramón Yung

Parlamentario pa

Frakshon di MFK