Minister Geoffrey Wever ta elabora riba 1 aña di gobernacion Recuperacion economico y desaroyo sostenibel

Minister Geoffrey Wever ta elabora riba 1 aña di gobernacion

Recuperacion economico y desaroyo sostenibel

 

Como Minister di Asuntonan Economico, Comunicacion y Desaroyo Sostenibel, mi ta kere firmemente den e importancia di “thinking outside the box” y na mesun momento mi ta balora trabounan cu nos professionals a bin ta haci caba. 

 

Pandemia a siña nos con resiliente nos economia ta si mira con Aruba ta recuperando economicamente. Pa 2022 Aruba su Gross Domestic Product (“GDP”) lo ta Afl. 5.927, cu ta representa un crecemento di 9.2%. Pa 2023 e proyeccion ta cu Aruba su GDP lo crece cu 4.0% compara cu 2022 den termino nominal. 

 

Nos a introduci un Vestigingsbeleid completamente modernisa a flexibilisa, simplificando e proceso y asina reduci red-tape pa stimula clima empresarial y clima di inversion. A elimina proceduranan innecesario y largo den e proceso y a digitalisa e proceso aun mas haciendo esaki mas eficiente. 

 

E Vestigingsbeleid nobo tin atencion special pa stimula e “Promising Sectors”, cu atencion special pa e principionan di sostenebilidad. Tambe nos lo keda cu atencion pa stimula actividad economico den Oranjestad y San Nicolas, haciendo inversion den e areanan aki mas facil. Cu e YES San Nicolas Summit nos a crea un plataforma pa empresarionan nobo of estableci traha hunto na progreso di San Nicolas.

 

Comision Recuperacion Economico a ser institui pa dialoga cu sector priva y demas stakeholders y a draft diferente proposicion di incentivanan economico. Proposicionnan di incentivanan economico ta trata di 

1) Stimula inversionnan

2) Desaroya e Promising Sectors

3) Stimula practicanan economico sostenibel. 

 

Desaroyo economico cu Aruba a hiba e ultimo 30-50 añanan no por continua di mesun forma. Nos mester ta consciente cu pa nos garantisa prosperidad riba nos isla nos mester haci e transicion pa un economia cu ta sostenibel, circular y inclusivo. 

 

Mester haci uzo di energia alternativo, promove siguridad di cuminda y awa, y enfoca riba sistema di construccion sostenibel. 

 

Sustainability Fund lo yuda cu financiamiento di proyectonan sostenibel. Tambe ta cuminsando cu un Agripreneurial Development Pilot Program den cual lo stimula entrepreneurship den e area di agricultura.

 

A cuminsa determina e prome pasonan den implementacion di e infrastructura di 5G, asina modernisando e infrastructura cual lo aporta na posibilidadnan nobo.

 

Ampliacion di e productonan di Canasta Basico tabata necesario den e tempo cu nos ta pasando aden. Pronto lo lansa un campaña di Educacion Financiero pa yuda finansas den hogarnan pa yuda ciudadanonan maneha nan finansas personal mihor. 

 

Aruba Fair Trade Authority ta ful den implementacion cual lo aporta na un clima di competencia husto cu lo desemboca den mihor calidad di servicio, calidad di producto y prijs mas husto pa e consumidor. Adicionalmente nos ta trahando pa fortifica e Consumentenbond y Consumentenbescherming como e bos y defensor di e derechonan di e consumidor.

 

Overkreditering y interes excesivo ta un problema di hopi aña. Nos a percura pa e ley cu ta regla e credito di consumidor, Landsverordening consumentenkrediet, a wordo aproba. Pronto lo establece e porcentahe maximo pa interes riba prestamo. Tambe lo anuncia un sistema di registracion di credito pa evita personanan cai den problema financiero pa via di demasiado prestamo.

 

Den cuadro di SDGs, meta 10, nos a cuminsa cu e proceso pa regla supplementary rights pa parehanan cu a drenta union civil asina percura pa nan tin derechonan igual na matrimonio.

 

Ta implementando e Sistema Nacional di Estadistica (“NSS”) pa asina gobierno tin un therment pa monitorea di manera mas confiabel y obhetivo con gobierno ta uza fondonan disponibel y segura cu decisionnan ta wordo haci abase di datos confiabel. 

 

Economia ta toca nos tur; p’esei desaroyo economico mester aporta na calidad di bida di nos tur como ciudadano. P’ami como minister di Asunto Economico, Comunicacion y Desaroyo Sostenibel ta un gran honor di por a traha e aña aki pa progreso di nos pueblo y nos Aruba. 

 

E aña binidero mi lo sigui enfoca riba progreso di nos comerciantenan y tambe mehoracion di e posicion di nos consumidornan, fortificando un balans mas husto unda tur hende na Aruba haya oportunidad pa participacion husto di e riqueza di nos pais, esei ta keda mi compromiso pa cu Aruba.

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: