KONMEMORASHON 30 AÑA ANIVERSARIO DI STICHTING MONUMENTENFONDS CURACAO

MINISTERIO KONSERNÍ TRÁFIKO, TRANSPORTE I PLANIFIKASHON URBANO

 

KONMEMORASHON 30 AÑA ANIVERSARIO DI STICHTING MONUMENTENFONDS CURACAO

PUBLIKÁ RIBA 24 ÒKTOBER 2022

Willemstad – Minister di Tráfiko, Transporte i Planifikashon Urbano, Sr. Charles Cooper, huntu ku Servisio pa Planifikashon Urbano (ROP) i Stichting Monumentenfonds a konmemorá 30 aña aniversario di St. Monumentenfonds.

 

For di djamars, 18 di òktober 2022, te ku djabièrnè, 21 òktober 2022, tabata tin e konferensia ‘World Heritage meets Main Street’ ku a konta ku partisipashon di diferente “stakeholders” tantu lokal komo internashonal.

 

Na inisio di e konferensia, Minister Cooper a hiba palabra, dunando St. Monumentenfonds elogio pa organisá un tipo di “masterclass” asinaki na Kòrsou. Durante di e dianan, ku por a konta riba un asistensia grandi, sinku diferente grupo ku a ser kreá a diskutí riba diferente aspekto pa loke ta trata nos sentro di siudat históriko. Meta di e aktividat aki tabata pa siña i apliká e prinsipionan básiko di ‘Main Street Movement’ pa ku nos monumentonan i dos areanan piloto den nos sentro di suidat. Den e konsepto di ‘Main Street’, a atendé ku e prinsipionan di organisashon, deseño, promoshon, i vitalidat ekonómiko. E gruponan tabata tin komo tarea pa analisá e diferente aspekto aki i trese nan rekomendashon dilanti pa medio di un presentashon. Den e diferente gruponan por a tuma nota di studiantenan di UoC i tambe hóben profeshonal, ku ta nos futuro.

 

Na final, kada partisipante a risibí un sertifikado. Minister Cooper a felisitá St. Monumentenfonds tambe ku nan aniversario i un evento eksitoso aki. E fundashon, di nan banda, a sigurá ku ta sigui na yuda reskatá mas monumento pa medio di finansiamentu. Tambe lo por siguí kordina e implementashon di e análisis di e 5 gruponan despues ku esaki ser presentá i raportá.

 

Ta importante pa rekordá pueblo di Kòrsou ku riba 4 di desèmber 2022 nos ta selebrá ku 25 aña pasa Willemstad Kòrsou a subi riba e lista di patrimonio mundial di UNESCO. Lo bai tin diferente aktividat pa selebrá e fecha i akto memorabel aki.

 

Pa informashon general pa tur produkto di ROP por tuma kontakto via e number +5999433-3200. Tambe por manda Whats app na number di telefòn +5999511-3874 òf por manda e-mail na info.rop@gobiernu.cw.

                                         

Share this page to Telegram

This site uses Akismet to reduce spam. Learn how your comment data is processed.

%d bloggers like this: