Petishon pa supsidio na SOAW via Unidat pa Supsidio Entrante promé di novèmber


Petishon pa supsidio na SOAW via Unidat pa Supsidio

Entrante promé di novèmber

 

Willemstad – Den kuadro pa mehorá i optimalisá maneho di fondonan pa supsidio, SOAW a inisiá un proyekto piloto di Unidat pa Supsidio for di yüni 2022.

 

For di diferente rapòrt di Algemene Rekenkamer di Kòrsou a konstatá ku tin problema struktural pa hopi aña, relashoná ku dunamentu di supsidio. Por ehèmpel na 2019, ARC a konstatá ku di 1.67 miar ku a otorgá na supsidio, sigur 15% (256 mion) no tabatin derechi riba e supsidio o no a kumpli ku e eksigensianan nesesario pa por a risibí supsidio.

 

Kousa di e problema ta, entre otro, falta di un maneho di supsidio na Kòrsou. Tambe no tin sufisiente kòntròl riba meta i efektividat na momentu ku duna supsidio. Falta di kapasidat i konosementu den e diferente ministerionan tambe ta pone ku petishon pa supsidio no ta keda tratá o entregá den e forma korekto.

Konsekuensia ta ku supsidionan ta keda otorgá sin un petishon òf programa di eksigensia. Falta di petishon òf programa di eksigensia a pone ku no tin un bista kla pa ki meta o aktividat a duna e supsidio.

Tampoko por kontrolá si e supsidio a keda usá di forma korekto òf di akuerdo ku e meta. Falta di dokumentashon i responsabilisashon pa maneho ta pone ku no sa si gastunan ku a keda hasí relashoná ku e supsidio ta konfiabel.

 

Ku e proyekto piloto di un Unidat pa Supsidio, SOAW lo tin un bista muchu mas dirigí riba instansianan ku ta risibí supsidio i kon por mehorá efektividat den realisashon di nan metanan. Tambe lo mehorá e proseso di ehekushon den kuadro di dunamentu di supsidio, di manera ku den futuro lo tin un base legal, pero tambe ku e meta di supsidio otorgá ta keda salbaguardiá.

 

Entrante promé di novèmber tur petishon pa supsidio i tur otro kos ku ta regardá supsidio lo keda atendé mediante Unidat pa Supsidio di SOAW. Por komuniká ku Unidat pa Supsidio di SOAW via subsidie-unitsoaw@gobiernu.cw

Share this page to Telegram

This site uses Akismet to reduce spam. Learn how your comment data is processed.

%d bloggers like this: