Kòrsou bon representá den kampeonato mundial hubenil di dam na Turkia.

Kòrsou bon representá den kampeonato mundial hubenil di dam na Turkia.

 

Durante e periodo di 30 di òktober pa 7 di novèmber último Federashon Mundial di Dam (World Draught Federation – FMJD) a organisá un kampeonato mundial di dam hubenil na e siudat Antalya na Turkia. Un kantidat di 20 pais di diferente parti di mundu a partisipá na e kampeonato aki. E biaha aki, pa promá biaha Kòrsou ta partisipá na e kampeonato mundial hubenil aki, representá pa e hoben Patrick Oseana di Klup di Dam Hubenil RAIS.

 

Patrick Oseana ta un hoben di 10 aña di edat, ku a partisipá den e kategoria di B-10 (Hopes Boys Open) den kua tabatin 19 partisipante, prosedente di entre otro Republika Cheko, Estonia, lituania, Hungria, Latvia, Mongolia, Polonia, Ukraina i Hulanda.

 

Tabata un kompetensia hopi fuerte kaminda un biaha mas paisnan di e parti Oost di Oropa a demostrá nan supremasia den wega di dam. Den e kategoria ku Patrick a partisipá tabata tin 2 hoben delegado ku tabata tin e titulo di “CMF”, ku ta kampeonnan mundial den nan kategoria.

 

Klup di Dam Hubenil Rais i prinsipalmente su instruktor señor Raoul Alias ta sumamente satisfecho ku e resultado di Patrick su partisipashon na e kampeonato aki. Pa su promé partisipashon den un torneo mundial, Patrick a logra un puntuashon di 9 – 7 den su kategoria.  Pues di 9 wega ku e a hunga, Patrick a finalisá ku 7 punto. Ganador di e kategoria aki ta e hoben Murun Knanat di Mongolia, ku score di 9 – 15. Pues di 9 wega ku Murun a hunga e a finalisá ku 15 punto.

 

Tabata un eksperiensha hopi grandi, kaminda Patrick por a eksperienshá wega di dam na un nivel hopi haltu, ku a duné e oportunidat pa amplia tantu su konosmentu riba téknika i strategianan nobo di wega di dam, pero tambe p’e siña kon atendé ku momentunan di stress i ku su sentimentunan.

 

Un gradesimentu ta bai na Klup di Dam Hubenil RAIS, pa e konfiansa ku nan a pone den Patrick pa partisipá den e torneo aki, meskos tambe na señor Payo Faneyte ku a duna un bunita kolabrorashon pa yuda kubri e ticket di Patrick di Kòrsou – Amsterdam i tambe un danki na señor Jacek Pawlicki, Presidente di Federashon Mundial di Dam (World Draught Federation – FMJD) ku e sosten di nan organisashon pa kubri ku e gastu di biahe di Hulanda pa Turkia di Patrick.

Share this page to Telegram

This site uses Akismet to reduce spam. Learn how your comment data is processed.

%d bloggers like this: