AQUALECTRA I BLUE NAP AMERICAS TA FIRMA UN AKUERDO PA MANEHO DI UN PLANTA SOLAR

AQUALECTRA I BLUE NAP AMERICAS TA FIRMA UN AKUERDO PA MANEHO DI UN PLANTA SOLAR

 

Willemstad 26 di desèmber 2022 –Aqualectra Multi Utility N.V. (AMU) un supsidiario di Integrated Utility Holding (IUH) i Blue NAP Americas resientemente a firma un akuerdo pa maneho di un planta solar na Blue NAP Americas. Esaki ta e promé fase di e proyekto “Rooftop Solar” kaminda lo instalá pènelnan solar riba e dak di e edifisio di Blue NAP Americas ku e meta pa yuda den maneho di redukshon di e kosto di energia ku Blue NAP Americas ta usa aktualmente. E ‘Rooftop Solar Power Plant’ (SPP) tin un kapasidat di 354 kilo Watt piek (kWp).  Na okashon di e firmamentu di e akuerdo a hiba palabra Minister enkargá ku Tráfiko, Transporte i Planifikashon Urbano, Sr. Charles Cooper, Minister enkargá ku Desaroyo Ekonómiko Ruisandro Cijntje, CEO di Blue NAP Americas, Sr. Giovanni King i tambe Sr. Darick Jonis CEO di Aqualectra.

AMU lo ta responsabel pa e diseño, konstrukshon, mantenshon i operashon di e SPP i tambe inkorporashon di e energia renovabel den e instalashon di Blue NAP Americas, ku ta un sentro di data “Tier -IV”, un di e dos nan mas avansá den e region di Pan-Caribbean. Ku e proyekto aki lo redusí e “footrpint” di konsumo di koriente i na mes momento  lo halsa abilidat di Blue Nap Americas pa kompetí riba e merkado internashonal i asina fortifiká su pólisa “bèrdè” i tambe amplia su portafolio di kliente.

E transishon energétiko na Kòrsou dia pa dia ta birando mas visibel. Redukshon di nos dependensia riba produktonan derivá for di petrolio ta e promé stap pa krea un pais mas rendabel i sostenibel den futuro. Intregated Utility Holding, pa medio di su supsidiarionan ta konsiente di e impakto ku energia  tin riba nos komunidat. Di e nesesidat pa desaroyonan ku ta dirigí na na oumento  di produkshon di mas energia renovabel i maneho ku ta sostené esaki.

Pa e motibu aki IUH i su supsidiarionan ta trahando inkansablemente pa stimulá i fortalesé  konservashon, efisiensia i e produkshon di energia renovabel. IUH pa medio di su supsidiarionan ta hasi uso di  su añanan di eksperensia pa ofresé produktonan konfiabel i segun normanan i reglanan eksistente i un servisio di kalidat haltu na su klientenan. Miéntras e sektor energétiko ta modernisá i digitalisá, e ròl di servisionan di utilidat ta birando mas imperativo. P’esei AMU ta fokus riba ofresé servisionan di balor agregá (‘Value Added Services’) na tur e klientenan ku e ta sirbi espesialmente esnan komersial, industrial i (semi) gubernamental.

Ku e akuerdo aki AMU ta fortalesé e posishon kompetitivo di Blue NAP Americas ku ta un kompania semi gubernamental ku ta operá lokal i internashonal. Un sentro di data rendabel ku ta funshoná optimal na Kòrsou i ta kontribuí na e ekonomia lokal i na bienestar di tur habitante di nos pais.