TUR BENDEDO DI KUMINDA I BEBIDA DURANTE AKTIVIDAT- I MARCHANAN DI KARNAVAL… ATENSHON !! SESHON DI INFORMASHON OBLIGATORIO DIA 21 YANÜARI

TUR BENDEDO DI KUMINDA I BEBIDA DURANTE AKTIVIDAT- I MARCHANAN DI KARNAVAL… ATENSHON !!

 

Ministerio di Salubridat, Medio Ambiente i Naturalesa ta invitá na…

 

SESHON DI INFORMASHON OBLIGATORIO DIA 21 YANÜARI

 

Willemstad – Pa tur hende ku ta bai bende kuminda i/ òf bebida ku públiko durante aktividat- i/ òf marchanan di karnaval tin un seshon di informashon obligatorio djasabra dia 21 yanüari 2023. Den kuadro di prevenshon pa e temporada di karnaval 2023 Departamento di Higiena Tékniko (THZ) di UO G&Gz (ántes GGD) ta tene un mainta di informashon pa tur doño di pèrmit pa bende alimento (kos di kome, kuminda i bebida) durante aktividatnan i/ òf riba ruta di marchanan. Riba e mainta aki lo pone énfasis riba kon pa atendé ku kuminda i/ òf bebida konforme reglanan di higiena di kuminda i higiena personal. E mainta di informashon aki lo  tuma lugá den koperashon ku Brandwer di Kòrsou ku ta bai pone énfasis riba e parti preventivo.

 

E mainta di informashon aki ta tuma lugá djasabra dia 21 di yanüari 2023 na e edifisio prinsipal di Ministerio di GMN na Colon, Roodeweg 49. Tin dos (2) seshon e mainta aki. E promé lo ta 9’or i e di dos ta 12’or. Esaki ta konta pa doño di pèrmit i un ajudante. Pa partisipá por registrá di djaluna dia 16 te ku djabièrnè 20 di yanüari na THZ telefòn 432- 2867 durante orario di trabou di 9’or pa 12’or di mainta i di 2’or pa 4’or di atardi.

 

Konforme lei tur persona ku ta prepará i bende alimento i kos di bebe na públiko mester tin un karchi di kúr válido di UO G&Gz (ántes GGD). Esaki ta konta pa tur hende ku ta prepará, bende, sirbi, kuminda i/ òf bebida. Pa saka bo karchi di kúr mester pasa un éksamen. Por pasa èksamen di djaluna pa djaweps di 08:00 pa 11:00 di mainta i di 14:00 pa 15:30 di atardi na G&Gz, Piscaderaweg 49, Mundu Nobo. Mester paga Ang. 50,- i presentá ku un pasfoto resién pa petishonnan nobo òf bo karchi bieu, un forma legal di identifikashon sea sèdula, pasport òf reibeweis.