50 Aniversario di trabou na Senior & Co I Curacao Laboratories

50 Aniversario di trabou na Senior & Co I Curacao Laboratories

 

Sr. Sidney Bazoer a kuminsa labora na Senior & Co I Curacao laboratories  dia 15 di Januari  1973. Ku su 16 anja ela kuminsa komo helper na e plantashon I despues a sigui labora den diferente funshon den e fabrika kaminda Senior Liqueur I Glacial ta wordu traha.

Den e temporada aki tur kos tabata wordu hasi manualmente, tempu ku no tabatin pallet jack, forklift of kompuiter. Segun Sidney ta indika tur kos tabata bai na man I esei ta algu ku a hasi e trabou di 50 anja pasa hopi mas pisa ku awendia ku tin equiponan moderno.

 

Koleganan ku a traha ku Sidney ta indika ku e ta un hende hopi trankil, ku tin gana di bini trabou tur dia I ku semper bo por konta riba dje.

Awendia Sidney  ta labora ketubai na Landhuis Chobolobo I ta un “All arounds operations employee”. Un trabou ku e ta eherse tur mainta I ku ta ensera kuido di e diferente equiponan. Tambe e ta enkarga pa juda kuida e palunan di Laraha , ku ta wordu husa pa destila Senior Liqueur.

 

Pa direktiva di Senior & Co I Curacao laboratories Sidney ta un hende hopi amabel I motiva , ku despues di 50 anja ahinda ta bini trabou tur dia ku e mesun  amor pa su trabou. Ela sa di sinja hopi kolega I ex koleganan den e area di produkshon kiko e trabou ta ensera I kiko ta rekeri pa nan por hasiele bon. Tur esaki enkombinashon ku e echo ku Sidney tin 50 anja laborando serka nos ta hasi Sidney un pilar fuerte di e kompania aki.

Na nomber di direktiva, koleganan I ex – koleganan di Senior & Co I Curacao laboratories nos ta jama Sidney danki pa a dedika 50 anja di  amabilidat , pasenshi, motivashon  I Amor pa ku su trabou I koleganan .

Dia 26 di Yanuari Sidney su aniversario a wordu selebra engrandi na Landhuis Chobolobo ku direktiva, koleganan I partnernan.