CBCS ta publiká resultado di enkuesta di partidonan interesá 2022

CBCS ta publiká resultado di enkuesta di partidonan interesá 2022

CBCS mihó mirá serka partidonan interesá

WILLEMSTAD/PHILIPSBURG – E partidonan interesá ku ta den interakshon regular ku
Centrale Bank van Curaçao en Sint Maarten (CBCS) ta sinti ku nan kontakto ku CBCS a
mehorá, nan tin un opinion mas positivo di CBCS i ta haña ku prestashon di CBCS a mehorá
kompará ku 2020. Esaki ta loke por konkluí for di e enkuesta ku e büró di investigashon
independiente RE-Quest a realisá riba enkargo di CBCS bou di Banko su partidonan interesá.
Aunke e resultadonan akí ta mas faborabel kompará ku e enkuesta realisá na 2020, e biaha
akí tambe e partisipantenan a menshoná e kasonan di Ennia & Giro, i CBCS su tempu di
respuesta, komo e puntonan prinsipal ku ta rekerí atenshon.

Na tur, 171 partido interesá a partisipá na e enkuesta online realisá na novèmber 2022. Meta di e
enkuesta tabata pa haña un mihó bista di e persepshon i eksperensia di e diferente gruponan di
partido interesá, i spesialmente e manera ku nan ta persibí nan kontakto ku CBCS, e imágen ku
nan tin di CBCS, nan persepshon tokante prestashon di CBCS, evaluashon di e tareanan prinsipal
di CBCS i e puntonan di atenshon i áreanan pa mehoramentu ku nan lo ke trese padilanti komo
partido interesá.
Kompará ku 2020, na 2022 e partidonan interesá tabatin un opinion mas positivo di CBCS
tokante kasi tur e aspektonan midí den e enkuesta. Riba un eskala di 10 punto, e karakterístikanan
ku CBCS a skor mas haltu p’e ta Integridat (7,7), Ekspertisio (7,3) i Konfiabilidat (7,2). Kompará ku
2020, e karakterístikanan Inovashon i Transparensia ta esunnan ku a bai mas dilanti den nan skor.
Meskos ku na 2020, e partidonan interesá bou di supervishon di CBCS tabatin un opinion un
poko mas positivo kompará ku esnan ku no ta bou di supervishon. Ta remarkabel tambe ku e
partisipantenan mes a premirá ku nan opinion tokante CBCS i su tareanan realisá lo ta mas
faborabel ku opinion di resto di komunidat.
Un di e kambionan positivo ta esun ku a bini dilanti na e pregunta tokante kuantu konfiansa e
partisipante tin den CBCS riba término largu. Na 2020, e kontesta ku a skor mas haltu tabata ‘un
poko konfiansa’, siguí pa ‘hopi konfiansa’. Den e último enkuesta akí, e situashon ei a bòltu i awor
ta ‘hopi konfiansa’ a skor mas haltu. Algun di e motibunan ku e partisipantenan ku ‘hopi
konfiansa’ a menshoná pa splika nan eskoho ta e invershonnan bisto ku CBCS a hasi pa mehorá
su servisio i komunikashon i, meskos ku na 2020, e konosementu i ekspertisio ku CBCS tin den
kas. Un di e partisipantenan a komentá: ‘Ta bisto ku tin un kambio den direkshon di mas
profeshonalismo’. Segun un otro partisipante: ‘En general, bo por mira ku di bèrdat nan ta
trahando pa bira mihó.’
E partisipantenan na e enkuesta a indiká ku, ademas di e puntonan di atenshon ya menshoná,
nan ta mira espasio pa mehorashon riba tereno di supervishon i di komunikashon ku komunidat,
entre otro relashoná ku ròl di CBCS, introdukshon di e moneda nobo (florin karibense) i e
desaroyonan relashoná ku moneda digital.
E resultadonan akí ta sirbi komo punto di salida pa CBCS sigui traha pa mehorá su servisio i su
komunikashon ku e diferente gruponan di partido interesá. ‘Ta bon pa tende ku nos partidonan
interesá ta ripará i balorá e invershonnan èkstra ku nos ta hasiendo pa mehorá nos kontakto ku
nan. Esaki ta un desaroyo ku nos ke sigui kuné, i ampli’é pa inkluí tambe públiko en general;
komunikando e ròl, tarea i importansia di CBCS’, asina Presidente di CBCS, Sr. Richard
Doornbosch a splika.
CBCS su intenshon ta di ripití e enkuesta regularmente pa asina identifiká tendensia i determiná si
e esfuersonan hasí pa mehorá su servisio i komunikashon ta resultando realmente den un mihó
persepshon i eksperensia di parti di su partidonan interesá.
E rapòrt ta disponibel riba nos wèpsait: http://www.centralbank.cw/publications/stakeholders-survey
Willemstad, 9 di febrüari 2023
CENTRALE BANK VAN CURAÇAO EN SINT MAARTEN