Periodo pa aplikashon di luna di novèmber i desèmber pa sosten di NOW i empresario individual ta habri

Periodo pa aplikashon di luna di novèmber i desèmber pa sosten di NOW i empresario individual ta habri

Geplaatst op 25 November 2020 dor di Ministerio Desaroyo Ekonómiko

WILLEMSTAD- Ministerio di Desaroyo Ekonómiko (MEO), na nòmber di Gobièrnu di Kòrsou, ta enkargá ku implementashon di sosten pa supsidio di salario (NOW) i di sosten finansiero na empresarionan individual (TBZO). Esaki pa empresanan ku ta hibando pèrdida finansiero a konsekuensia di e pandemia di COVID-19. Pa medio di e komunikado akí, MEO ta anunsiá ku pa ámbos areglo e periodo pa hasi aplikashon pa luna di novèmber i alabes pa luna di desèmber ta habri djamars 24 di novèmber 4’or di atardi te ku djamars 1 di desèmber 4’or di atardi.

Mirando ku temporada di fiesta ta aserkando, Minister di Desaroyo Ekonómiko, Sr. Steven Martina, huntu ku Minister di Finansa, Sr. Kenneth Gijsbertha, a tuma e desishon pa hasi un eksepshon i duna oportunidat pa hasi aplikashon pa tur dos luna benidero for di e siman aki. Hasiendo esaki, lo por traha mas efisiente riba e parti di kontrol i ehekushon di pago di tur dos petishon i asina garantisá ku nos empresanan i nan trahadónan lo risibí e sosten finansiero na tempu pa nan por disfrutá trankil i sin muchu preokupashon di e dianan di fiesta ku nan sernan kerí.

Esaki ta un situashon eksepshonal ku lo rekerí tambe e kooperashon di tur empresario pa nan entregá tur e rekisitonan te kaminda esaki ta posibel pa luna di desèmber adelantá. Manera kustumber, tur empresario ku ya a yega di hasi aplikashon pa e sosten di supsidio di salario (NOW) i tambe sosten pa empresario individual, lo risibí dos link diferente via mail pa por hasi aplikashon pa kada luna separá. Mester hasi solamente adaptashonnan nesesario den nan aplikashon i/òf sifranan di e luna korespondiente.

Pa aplikashonnan nobo pa luna di novèmber di e sosten di supsidio salarial, NOW por hasi esaki manera kustumber via di e portal ku lo ta habrí riba e wèpsait www.fondodisosten.org. Pa e aplikashon di luna di desèmber e empresa lo risibí e link seguidamente via mail.

Pa aplikashonnan nobo di e sosten pa empresario individual (TBZO) mester manda un mail na empresario@fondodisosten.org promé ku 1 di desèmber pa 4’or di atardi ku nòmber i number di telefòn, informashon di e empresa i un kopia di registro di Kámara di Komèrsio. Tene kuenta ku kontrali na e luna anterior e portal di sosten pa empresario individual (TBZO) lo NO habri. Un supliká ta bai pa tur empresario pa hasi nan aplikashon solamente durante ku e periodo ta vigente.

Durante un konferensha di prensa djárason, 25 di novèmber, minister Steven Martina huntu ku koleganan di su ministerio a splika mas aleu tokante e motivashon tras di e desishon akí pa atendé e areglo empresarial di novèmber i desèmber huntu. Tambe e minister a amplia riba e plan pa próksimamente ekstendé e paketenan di sosten empresarial akí pa asina brinda empresa i empresarionan èkstra sosten den entre otro un kompensashon den nan gastunan fiho, pero tambe programanan di formashon. Esaki basá riba e embergadura asina úniko i durashon di e pandemia aki.
E ministerio ya a risibí akuerdo pa por ehekutá e ekstenshonnan den e sosten empresarial i ta hasiendo e trabounan nesesario pa implementá esaki mas pronto posibel.

Empresarionan ku tin mester di informashon adishonal tokante un di e sostennan disponibel akí, por tuma nota di e splikashon riba wèpsait di Fondo di Sosten (www.fondodisosten.org) promé ku apliká. Pa kualke pregunta i/òf otro informashon por aserká helpdesk di NOW pa medio di email adrès: now@fondodisosten.org òf e helpdesk di TBZO pa medio di email adrès: empresario@fondodisosten.org òf tambe via WhatsApp 516-2415.

 

Pa download e presentashon ku a keda kompartí durante rueda di prensa di djárason, 25 di novèmber, klek aki: https://bit.ly/sostenempresarial

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: