Fundashon Nos Grandinan ta bai organisá un aktividat sosial úniko pa tur Nos Grandinan riba 60 aña ku tin Down Syndrome
Ya pa kuater aña konsekutivo, pueblo di Kòrsou ta biba ku e Dia Internashonal di Down Syndrome i ta bisti e tan gustá happy socks. E dia internashonal aki a bira un dia hopi speshal kaminda tur persona ku tin e Síndome di Down ta sinti nan apresiá, hopi kerí i balorá den nan komunidat. Nos por mira kuantu hoben, mucha i hasta baby ta sali ku nan mayornan i/òf famianan pa partisipá na diferente evento ku ta organisá speshalmente pa nan riba e dia noble aki.
Mester para ketu i kòrda tambe riba esnan ku no sa sali kas fásil, kual ta nos grandinan di 60 aña òf mas ku tin e bendishon i tambe suerte di logra edatnan haltu den nan kondishon. Esaki sin duda ta danki na e.o. e amor i bon kuido ku nan ta risibí serka nan famia direkto i/òf e instituto ku ta kuida nan i naturalmente siensia i teknologia ta pone ku awendia e personanan aki por logra na mira 60 aña di bida òf mas. Por ehèmpel den file di Fundashon Nos Grandinan, na aña 2014, sr. Augusto Troncon a selebrá 85 aña na SGR Groep (Fundashon Verriet). Ta un edat basta respetá pa un persona ku tin e Síndome di Down.
Fundashon Nos Grandinan, pa kumpli ku e kampaña “Amigu di Nos Grandinan”, ta bai organisá un aktividat sosial úniko pa nos grandinan ku tin Down Syndrome. E evento aki lo bai ta dediká na memoria di srs. Eddy Curiel i Charles “Chaleco” Curiel ku ta 2 ruman ku tabata tin Down Syndrome—ámbos a logra yega e edat di 61 aña i tabata bon protehá i kuidá pa nan famia direkto, meskos ku hopi otro famia a/ta hasi esaki.
E aktividat sosial ku ta pinta di bira grandioso ta pa personanan ku ta movibel, sea riba nan propio forsa òf por medio di ròlstul—delaster un ta konta! Pa loke ta trata nos grandinan ku tin e Síndome di Down pero ta na kama i no ta movibel mas, Fundashon Nos Grandinan lo bai duna atenshon personal na kada un di nan individualmente, di moda ku nan ku ta na kama tambe por risibí nan regalonan ku empresanan tin nétamente pa nan den nan kondishon i tambe nan pakete ku produktonan di uso personal.
Famianan i caregivers por tuma kontakto ku sra. Jenny Tearr, verpleegster penshonado i alaves sekretaria di Fundashon Nos Grandinan. E number di kontakto ta (+599-9) 687-0432 i por sea yama i/òf por manda whatsapp, menshonando lo siguiente: nòmber di e grandi ku tin e Síndome di Down, su fam, edat, fecha di nasementu, adrès, bario, persona di kontakto, number di telefòn di e persona di kontakto, mester sa si e persona en kuestion ta movibel òf na kama i si e persona ta diabétiko. Fundashon Nos Grandinan ta garantisá ku por tin tur konfiansa ku lo atendé informashon konfidensial optené ku koutela, respetando i aplikando regla- i normanan internashonal i nashonal di privasidat.
Empresanan ku ta deseá pa kontribuí ku regalonan, manera e.o. produkto(nan), servisio, gift cheque(s) i lo demas, na tantu e grandinan ku tin e Síndome di Down ku ta movibel òf no, tambe por tuma kontakto ku e number menshoná mas ariba.
Pronto e fecha aktividat sosial noble aki lo ta konosí pa un i tur, kual ta bai bira un evento inolvidabel pa e niche di nos grandinan ku tin Down Syndrome. Lo bai duna rekonosementu na famia Curiel, komo ehèmpel i tambe komo símbolo di gratitut na tur famia ku ta protehá i duna bon kuido na nan ser(nan) stimá ku tin e Síndome di Down. Mas ku klaro lo bai rekonosé tambe personanan ku a dediká nan alma na e niche aki ku ta sra. Aminta Sprockel i sra. Alice Loos i tambe na instanshanan ku tambe ta traha duru pa e niche aki manera e.o. SGR Groep (Fundashon Verriet), Totolika, Nafasi Groep, Down Syndrome Awareness Curaçao i lo demas pa nan esfuerso i dedikashon kontinuo.
Pronto, Fundashon Nos Grandinan lo informá Kòrsou kompletu ken ta e persona di mas edat ku tin Down Syndrome. E fecha pa e aktividat sosial grandioso aki lo wòrdu anunsiá asina ku Fundashon Nos Grandinan tin tur persona registrá. Por último, keda pendiente, pasó e próksimo aktividat sosial ku lo bai tin ta pa nos grandinan ku tin desabilidat físiko (handicap).
