Ta hasi sakrifisio di animal pa medio di sita

Willemstad – Departamentu di Asuntunan Veterinario a anunsiá na komunidat ku lo duna servisio di matansa di animal pa medio di e sistema di sita definitivamente entrante promé di aprel 2023, despues di a informá via diferente medio di komunikashon for di prinsipio di luna di desèmber 2022. Por yama òf Whatsapp, por lo ménos dos dia delantá, via 689 1291 òf 685 1292 pa traha un sita.

Di e forma aki ta trata na brinda servisio na klientenan di Asuntunan Veterinario di un forma mas efisiente teniendo kuenta ku e realidat di falta di personal i fondonan limitá, ku ta pone ku no por ehekutá otro tareanan di sumo importansha pa salubridat públiko debidamente. Por ehèmpel kontròl di establisimentunan ku ta bende karni i mantenshon di mataderonan.

Ministerio di Salubridat i departamentu di Asuntunan Veterinario ta pidi su klientenan diskulpa pa kualke inkumbiniensha ku e medida aki por trese kuné. Alabes ta gradisí klientenan pa e koperashon pa nos por sigi brinda servisio di matansa optimal. Pa mas informashon por mail Asuntunan Veterinario via: info.uovz@gobiernu.cw.