KAMBIO DEN DIANAN DI SAKRIFISIO DI ANIMAL PA FIN DI APREL

Willemstad – Den e último siman di aprel lo tin matansa di animal solamente riba djárason 26 di aprel na Parera i lo no tin matansa na Barber riba djabièrnè 28 di aprel.

Motibo pa esaki ta ku departamentu di Asuntunan Veterinario a organisá un kurso di “upgrading” kaminda ta trata e proseso di sakrifisio di animal den su totalidat, inkluyendo bienestar di animal, higiena i téknika di matansa. Personal di abatuar di Kòrsou, Aruba, Boneiru i St. Eustatius lo forma parti di e kurso aki.

E kurso lo tuma lugá di 24 di aprel te ku 28 di aprel 2023 na abatuar Parera i lo ser duná dor di e instituto renombrá riba e tereno aki: SVO vakopleiding – Food.

Ta importante pa sòru pa e konosementu di nos personal di matansa di animal keda na nivel i pa sigui ku desaroyonan mundial riba e tereno spesífiko aki. Di e forma aki por brinda un servisio na nivel haltu manera mester ta, pa ku e proseso di sakrifisio i kùr, ya e produkto final ta seif pa e konsumidó.

Nos ta pidi indulgensia di kriadónan di bestia pa ku esaki.

Por yama òf app kùrmester pa un sita pa matansa via 689 1291 / 685 1292 òf pa mas informashon por manda un e-mail na info.uovz@gobiernu.cw