Wardakosta lo bai hasi kòntròlnan riba laman durante Siman Santu

Wardakosta ta informá doñonan di boto i seadoo pa tene kuenta pa tur tin nan dokumentonan bálido na bordo kual nan ta nan: karchi di kür, karchi di registrashon, ‘vaarvergunning’ i e ‘vaarbewijs’ di e kapitan, mester tin sufisiente vèst di salbabida abordo abase di e pèrmit di e boto, no por bai ku dimas pasahero abordo di e boto pa evitá situashon peligroso, además mester tin artefaktonan apropiá di señal i flùit na bordo. Lo tin kòntròl riba tur e rekistonan akí di boto dor di Wardakosta. Wardakosta lo tei ku diferente di nan unidatnan durante Siman Santu riba laman, e botonan Metal Shark, algun seadoo i tambe e cutter Jaguar pa asina nos por kubri vigilansha i brinda seguridat konhuntamente ku nos otro partnernan di e Operashon Siman Santu i CITRO na henter e kosta di Kòrsou. Banda di esaki e helikòpter lo tira bista riba entre otro Klein Curaçao. Wardakosta lo tei presente tambe na Wèstpunt kaminda lo bai tin e Boat Party kual diferente boto lo bishitá durante di djadumingu.

Wardakosta ta konsehá tur doño di boto pa laga hasi mantenshon frekuentemente na nan boto. Sòru pa bo tin sufisiente medionan di seguridat i ekipo di reskate na bordo, tal manera: chaleko di salbabida, flèshlait, kaha di promé asistensha (EHBO-kit), sufisiente awa, aparato pa paga kandela, radio VHF òf telefon selular ku bateria kargá. Evitá ku bo boto ta daña na kaminda i kubo tin un situashon peligroso riba laman ku bo boto i bo pasaheronan. Den kaso ku bo mester di yudansa, bo por yama Wardakosta riba e number 913 of Whatsapp 005999 510 0913.