TRASPASO ANFITEATER JOPI HART DI KAYA KAYA PA SKO

 

 

Willemstad – Resientemente Kaya Kaya a hasi traspaso di Anfiteater Jopi Hart pa Fundashon Sosiedat di Komersiantenan di Otrobanda (SKO). Jacqueline Seibald, miembro di SKO, ta enkargá ku maneho di e anfiteater. Meta di e anfiteater ta pa duna organisashonnan oportunidat pa hasi uso di e fasilidatnan ku e teater ta brinda pa duna kualke presentashon.

 

E organisashon di Kaya Kaya ademas di e konosido Festival ta trahando riba mehorashon di infrastruktura di e bario Ser’i Otrobanda. Den transkurso di e último 6 añanan por mira hopi kambio notabel den e área di Ser’i Otrobanda Ost i Ser’i Otrobanda Wèst. Un di e orguyonan di Kaya Kaya ta transformashon di e área konserní den Naniestraat, ku no tabata tin ningun funshon, den un anfiteater. Algun dia promé ku e Festival na 2022 Kaya Kaya a inougurá e anfiteater dunando alabes rekonosementu na e baluarte di Otrobanda, Jopi Hart.

 

Ku e anfiteater no solamente e bario di Otrobanda pero henter pueblo di Kòrsou a haña un teater den aire liber pa duna kualke presentashon. Por pensa riba entre otro sine/video, presentashon musikal, obra teatral etc. Realisashon di e Anfiteater Jopi Hart tabata posibel ku fondonan ku Freedom Hotel, SKO i ENNIA a pone disponibel.

 

Kaya Kaya su intenshon semper ta pa yuda den maneho i mantenshon di organisashonnan eksistente, manera den e kaso aki di SKO, ku lo manehá, mantené i supervisá Anfiteater Jopi Hart. Ku e ‘handshake’ fuerte entre un di e direktornan di Kaya Kaya, Kurt Schoop i miembro di SKO, Jaqueline Seibald a pasa e anfiteater ofisialmente pa SKO.

 

Pa informashon tokante e kondishonnan pa hasi uso di Anfiteater Jopi Hart por tuma kontakto ku SKO na number di telefón/whatsapp +59995158767.

 

Pa sigui Kaya Kaya 2023 bishitá e diferente páginanan sosial di Kaya Kaya Festival.

#kayakaya #kayakayafestital #kayakaya2023 #curacao #otrobanda #otrobandadistrict #discoverotrobanda

 

 

Potrèt: por mira momentu ku Kurt Schoop representando Kaya Kaya ta hasi traspaso ofisial di Anfiteater Jopi Hart pa Jaqueline Seibald, miembro di SKO enkargá ku maneho di e anfiteater.