Petishon pa un reunion Públiko riba kontenido inkriminatorio di e rapòrtnan forénsiko relashoná ku negosashonnan di RDK/CPR
Na: Presidente di Parlamento di Kòrsou
Sra. Ch. America-Francisca
Wilhelminaplein 4
Presente
Willemstad, 14 di aprel 2023
Tópiko: Petishon pa un reunion Públiko riba kontenido inkriminatorio di e rapòrtnan forénsiko relashoná ku negosashonnan di RDK/CPR
Honorabel sra. America-Francisca,
Pa medio di esaki suskritonan ta aserká bo enkuanto lo siguiente.
Manera ta konosí, durante di e reunion públiko di 16 di yanüari último, riba e tema di “desaroyonan di negosashon pa apertura di refineria”, Minister President sr. Pisas a trese dilanti ku e lo laga Refineria di Kòrsou N.V. (RdK) pone algun dokumento relashoná ku e tema di e reunion, “ter inzage” di Parlamento, na un lokalidat i riba un fecha apuntá pa RdK. E dokumentonan aki a ser poné “ter inzage” di Parlamento entrante e siman di 20 di mart 2023, na e ofisina di RdK
Suskrito i lider di Frakshon di PAR den Parlamento, sr. Girigorie, a hasi uso di su derecho di tuma nota “inzage” di e dokumentonan ariba menshoná. Entretantu a transkurí mas ku 2 siman den kua tur miembro a haña oportunidat pa por a tuma nota di e dokumentonan ku a ser poné na disposishon di Parlamento.
Mirando ku no por a tuma nota di e dokumentonan durante di e reunion públiko, Parlamento no a haña e oportunidat pa debatí riba kontenido di e dokumentonan aki durante e reunion públiko, manera ta usual.
E informashonnan ku sr Girigorie a tuma nota di dje durante di su “inzage” i kua informashon el a kompartí ku miembronan di su Frakshon, ta di índole asina grave, ku pa suskritonan ta altamente urgente i nesesario pa Parlamento kompletu deliberá riba e konklushon ku por saka for di e dokumentonan aki, prinsipalmente e rapòrtnan relashoná ku e investigashon forénsiko di e dokumentonan falsifiká. Deliberashon di Parlamento por den su totalidat ta bira aún mas urgente i nesesario, momentu ku tuma nota ku informashon suministrá dor di Gobièrnu di Kòrsou na Parlamento durante di e reunionnan riba e tema aki (11 i 16 di yanüari 2023), NO ta kuadra ku (ta kontrali na) kontenido di e rapòrtnan forénsiko poné na disposishon di Parlamento.
Pa por garantisá konfiansa di Parlamento i di komunidat kompletu den e proseso rápido inisiá resientemente pa buskedá di un operadó pa Refineria, suskritonan ta aserká señora presidente ku e petishon pa yama un reunion Públiko (konforme art 64 di Reglamentu di Órden di Parlamento) ku karakter di urgensia pa asina Parlamento por deliberá riba e dokumentonan poné na su disposishon a base di e reunion públiko di 16 di yanüari último i risibí splikashon konkreto di parti di Promé Minister Pisas riba deklarashonnan hasí dor di Gobièrnu na Parlamento durante e reunionnan ya indiká.
Mirando e importansia di e tema, pa trankilidat di nos komunidat i pa buena marcha di e proseso pa yega na un operadó pa Refineria, ku ya a wòrdu tachá pa aktonan dudoso, nos ta aksentuá e nesesidat pa e reunion aki wòrdu yamá ku karakter di urgensia.
Den e eventualidat ku (parti di) e informashon na disposishon di Parlamento tin un grado haltu di konfidensialidat, por hasi uso temporalmente di art 104 di Reglamentu di Órden i art 55 insiso 2 di Areglo di Estado, pa garantisá konfidensialidat di sierto informashon.
Gradisiendo sra presidente di antemano pa e komprenshon i koperashon, nos te keda
Atentamente,
Quincy Girigorie Ana Maria Pauletta Steven Croes