Grupo di mucha entre 6 pa 13 aña a kompletá e kurso “Komunikashon i Presentashon pa Mucha” ku éksito durante nan vakashon
Willemstad– Na final di vakashon un grupo di mucha entre 6 pa 13 aña a risibí nan sertifikado i selebrá e echo ku nan a kompletá e kurso “Komunikashon i Presentashon pa Mucha” ku éksito. E kurso aki a keda organisá i presentá pa dP WriteThings ku patrosinashon di diferente persona, kompania i organisashon lokal ku ta kere den e importansia di invertí den nos futuro generashon.
Durante di e tayer aki e muchanan a risibí tur e konosementu i entrenamentu nesesario pa por komuniká mihó i presentá efisiente dilanti di un grupo òf públiko. Muchanan ku ta tímido i tin difikultat òf miedu pa komuniká òf presentá a risibí guia profeshonal pa por kibra e miedu aki, superá nan mes i desaroyá den e aria komunikativo. Pa medio di wega i diferente tarea, e muchanan a keda stimulá i eduká pa pensa krítiko, formulá i vosiferá nan opinion, krea nan propio presentashon i hiba palabra aplikando téknikanan di komunikashon i presentashon. E kurso aki sigur a yuda krea mas konfiansa propio den e muchanan pa asina nan por ekspresá nan mes mihó i engrandesé nan éksito na skol i den nan futuro karera.
Banda di mayornan ku a invertí pa nan yu por a partisipá na e kurso aki, dP WriteThings ke gradisí tur persona, kompania i organisashon ku a hasi posibel ku algun mucha por a haña e oportunidat pa partisipá gratuitamente na e kurso aki. Un danki spesial na Integra Natural, ProBella Fit Curaçao, ERM Quality Experience, Mi Boka, Klínika Dental Avodah, Sra. Viola Luciana, Iglesia House of Worship, Fundashon SIFMA/ ODIM i Feel Rite Sports & Spa Massage pa nan kontribushon den realisashon di esaki.
For di e kurso aki nos por mira kuantu potensial nos muchanan di Kòrsou tin i nos tin e siguransa ku esaki ta un bon simia plantá den e muchanan aki su bida. Nos no sa nunka ku entre nan por tin nos futuro Promé Minister.
Den luna di yüli prόksimo lo tin e di dos edishon di e kurso aki. Un yamada ta bai na tur persona, instansia i kompania lokal ku ke aportá na e kurso aki pa tuma kontakto ku dP WriteThings na telefòn 524-4687. Di e forma aki nos por traha huntu pa pone nos muchanan riba é kaminda di éksito i krea un generashon fuerte di lidernan ku for di un edat hόben por ekspresá i presentá nan mes ku konfiansa.
