Kòrsou ta konose 7 kandidata pa Miss Curaçao 2023

 

 

 

 

WILLEMSTAD  – 17 di aprel 2023 – Despues di un aña eksitoso, kaminda Kòrsou a  posishona su mes entre e 5 damanan di mas bunita i talentoso di universo, e organisashon enkargá Curaçao Beauty Pageant Committee a presenta awe den e sala di “Belle Alliance” na Avila Beach Hotel, e 7 kandidatanan pa e sertamen Miss Kòrsou 2023.

Tabata un anochi ameno den presensia di un grupo selektá, ku famia, spònsòrnan i medionan di prensa, inspirá den kuadro di dekada 60.

Manera ta konosí, e organisashon di Miss Universo tin un maneho kompletamente nobo, kual a adapta reglanan pa amplia i promove inklushon di mas perfil di e hende muhe komo partisipante. Entre-otro, awor tambe por partisipa damanan kasá, damanan na estado, damanan ku ju i transgénero. Pa Kòrsou esaki tambe ta un novedat, komo ku e aña aki tin un dama tambe ku ta mama pa prome biaha den historia di sertamen di Miss Kòrsou.

e 7 Partisipantenan pa Miss Kòrsou 2023 ta:

#1: Bianty Gomperts, #2: Kimberly Becker, #3: Nethania Hill, #4: Kimberly Fernandes, #5: Julia Schreiber, #6: Kim Rossen, #7: Thianny Braafhart.

 

Mes ora trabounan di preparashon fuerte a kuminsa pa forma e kandidatanan aki den e proksimo 40 dianan ku ta na kaminda. Preparashon ta inklui seshonnan di dominio di pasarela i esenario, konosementu general i turismo, komunikashon, protokòl i etiketa i hopi mas.

Curaçao Beauty Pageant Committee ta desea nos 7 kandidatanan suerte i alaves ta invita pueblo di Kòrsou pa sigui apoya e desaroyonan rondó di e sertamen Miss Kòrsou 2023 via pagina di faceBook ‘Curaçao Beauty Pagant Committee’. E anochi final di sertamen Miss Kòrsou lo tuma lugá dia 27 di Mèi 2023.