*Ehekutivonan di bòkseo Gustavo Padilla i Janny Guzman na Kòrsou…* & Tur Bòksdó A Keda Den E Límite Di Peso Paktá

Pa yuda supervisá i duna klínika:

*Ehekutivonan di bòkseo Gustavo Padilla i Janny Guzman na Kòrsou…*

 

WILLEMSTAD – Djárason último a yega Kòrsou e ehekutivonan di bòkseo Gustavo Padilla i Janny Guzman for di Panama i Puerto Riko respektivamente.

Riba dia di Rei e dos ehekutivonan a reuní ku ehekutivonan di bòkseo na Kòrsou pa duna esakinan un mini klínika kombiná ku un seshon di informashon relashoná ku e evento di ku ta tuma lugá  djasabra 29 di aprel den Sambil Arena.

Gustavo Padilla di Panama (spesialisá den e parti di wesnan di AMB) i e árbitro Janny Guzman di Puerto Riko a bin spesialmente pa yuda nos ehekutivonan lokal i e organisadónan ku detayenan importante relashoná ku e evento internashonal di bòksdó pa awe djasabra.

Padilla i Guzman a instruí e organisadónan riba e lokual nan mester tene kuenta kuné, manera entre otro kon e seshon di pisamentu mester bai, ken por drenta serka e bòksdónan, kon mester supervisá e bistimentu di wante i diferente otro aspekto legal i obligatorio ku mester kumpli kuné.

Djabièrnè na Acoya, den oranan di mainta, e ehekutivonan Padilla i Guzman a tene un seshon informativo i alabes a duna un klínika na tantu e wesnan komo e árbitronan ku ta pendiente pa guia i skor e peleanan di awe djasabra den Sambil Arena.

Sigur un tremendo inisiativa di parti Curaçao International Boxing Foundation, Supreme Boxing Center i Curacao Boxing Association.

 

 

E ora sero ta yegando pa un tremendo anochi den Sambil Arena:

Tur Bòksdó A Keda Den E Límite Di Peso Paktá

Ta start 6’or en punto !!

WILLEMSTAD – Tur kos a i ta kanando sumamente bon pa awe djasabra den Sambil Arena nos haña e grandioso programa di bòkseo internashonal i amatùr presentá pa Supreme Boxing den koperashon ku Curabox. Ayera tur e bòksdónan ku ta mira akshon awe den Sambil Arena a akudí na Centro Sambil pa kumpli ku e parti di pisamentu i mester menshoná ku tur a kumpli den nan respektivo peso stipulá.

Keiber Gonzalez i Jesus Aviles ta keda bou di 160 liber.

E kombate prinsipal lo bai entre e venezolano invikto Keiber Gonzalez Zapata i e peruano Jesus Aviles Reategui den e kategoria peso mediano (160 liber ). Lo ta un kombate di 10 asalto. E venezolano Keiber Gonzalez ta invikto ku un marka di (18-0, 16KO’s) i ayera na momentu di pesahe esaki a registrá un peso di 159.6 liber miéntras ku su oponente Jesus Aviles ku tin un marka di (9-7, 2KO’s) a registrá un peso di 157,7 liber. Pues ámbos a keda bou di 160 liber manera paktá.

Felix Gutierez Guzman i Pedro Sanchez ta keda den e limite di 149 liber

Pa loke ta e otro kombate profeshonal pa awe djasabra e bòksdó dominikano Felix Gutierrez Guzman ta enfrentá e debutante venezolano Pedro Sanchez den un pelea peso wèlter (149 liber) paktá na 4 asalto. E bòksdó Felix Gutierrez Guzman tin un marka di (0-5) i ayera a registrá un peso di 149.7 liber. E tabata poko riba e peso paktá pero esaki ta nèt den e límite permití. Pa loke ta e debutante Pedro Sanchez di Venezuela esaki a registrá un peso di 147.1 liber. Guzman ta bin tur ku tin pa logra su promé viktoria miéntras ku Sanchez ta ansioso pa debutá ku un viktoria komo profeshonal.

E evento ta start for di 6’or di atardi.

Pues tur kos ta kla pa nos haña tremendo kartelera di bòkseo profeshonal/amatùr awe djasabra den Sambil Arena. Entrada pa e grandioso velada boksistiko aki ta: 35 Florin General, 75 florin pa (VIP plùs) na Ringside, 50 florin VIP i mucha bou di 12 aña ta paga únikamente 10 florin. Si bo ta stima bòkseo bo mester tei. Kòrda ku ta start for di 6’or di atardi i finalisá 10’or di anochi. Komo bon fanátiko i amante di bòkseo bo no por pèrdè e tremendo evento aki.