LABDEMED TA KANA DILANTI KU SIMAN DEDIKÁ NA DIABÉTIS DEN LUNA DI MEI
Tin gran nesesidat pa atendé ku situashon lokal:
LABDEMED TA KANA DILANTI KU SIMAN DEDIKÁ NA DIABÉTIS DEN LUNA DI MEI
Willemstad 3 di Mei 2023 – E aña aki Laboratorio de Medicos (LABdeMED) a skohe pa duna atenshon speshal na e tema diabétis dor di introdusí su siman di diabétis ku lo tuma lugá den luna di mei.
Por konsiderá esaki komo un antesala promé ku Dia Internashonal di Diabétis riba 14 di novèmber 2023. E situashon di diabétis na Kòrsou ta keda unu hopi alarmante i LABdeMED ta kere ku ta importante pa duna atenshon na prevenshon pero tambe halsa e nivel di kuido ku ta nesesario pa atendé ku e malesa króniko aki. Den e kuadro aki LABdeMED ta organisá diferente seshon edukativo i akreditá pa profeshonalnan, manera entre otro un simposio ku lo trata e kolaborashon nesesario entre kuido primario i kuido sekundario. Alabes, lo tin seshonnan kulinario dediká speshal na e pashènt i otro interesadonan. Den e seshonnan titulá ‘Culinary Medicine Experience’ dòkternan di kas lo siña partisipantenan kon nan mes por kushiná platonan sukulento ku ta saludabel i debidamente balansá ku ingredientenan lokal.
Mas ku mitar di nos poblashon ta dil ku un òf mas malesanan króniko manera problema di kurason, sobrepeso i diabétis. E porsentahe di hendenan den nos komunidat ku ta sufri di diabétis ta hopi haltu.
Ta notabel ku pashèntnan di diabétis no ta kuida tur ora manera mester ta, hopi bia pa falta di konosementu, kual ta hiba na konsekuensianan serio pa e salú. Otro konsekuensia ta ku esaki ta pone mas preshon riba nos kuido lokal. Parti di e filosofia di LABdeMED ta pa prevení malesanan króniko mas tantu posibel dor di konsientisá mas tantu posibel. Pa e motibu aki LABdeMED ta skohe pa invertí regularmente den aktividatnan ku ta konsientisá i eduká nos pueblo. Sinembargo, prevenshon i kuido na nivel ta kana huntu. Pashèntnan ku tin malesanan króniko manera diabétis mester por haña un kuido lokal na nivel avansá. P’esei LABdeMED ta haña importante pa sostené nos profeshonalnan.
Di e forma aki LABdeMED ta skohe pa kuminsá duna mas atenshon na e situashon lokal di e malesa króniko di diabétis. Personanan ku ta interesá pa risibí mas informashon tokante LABdeMED su siman di diabétis òf e servisionan na pashèntnan ku diabétis por yama 736-1060.
