AKUERDO DI PREFERENSIA PA DESAROYO DI UN MARINA DEN ÁREA DI PISCADERA

Willemstad – Ku e meta pa ‘boost’ diferente forma di Kòrsou su ekonomia, Minister Charles Cooper riba djabièrnè 12 di mei a sera un akuerdo di preferensia ku e kompania Silver Reef Resort N.V. pa por posiblemente desaroyá un marina den área di Piscadera.

Silver Reef Resort N.V. a risibí un asina yamá ‘voorkeursrecht’, pues derecho di preferensia pa desaroyá un marina na Piscadera. Si e kompania aki kumpli ku tur e kondishonnan menshoná den e akuerdo di reservashon aki, Gobièrnu di Kòrsou lo por otorgá e derechonan pa uso di e espasio di awa na Piscadera, i asina desaroyá un marina.

Minister Cooper, di e forma aki, ta sigui move riba diferente frontera pa impulsá nos pais positivamente, biniendo ku desaroyonan nobo.

Minister Gilmar Pisas tambe tabata presente na e okashon di firmamentu di e akuerdo menshoná, representando e Ministerio di Salubridat, Medio Ambiente, i Naturalesa, spesífikamente e parti di Medio Ambiente i Naturalesa den e kaso aki.