Delegashonnan di Parlamentonan di Kòrsou, Aruba i Sint Maarten a reuní den Tripartit na Den Haag.

Delegashonnan di Parlamentonan di Kòrsou, Aruba i Sint Maarten a reuní den Tripartit na Den Haag.

Djárason 31 di mei 2023, tradishonalmente un dia promé ku e reunionnan Interparlamentario di Reino (IPKO), e delegashonnan di Parlamentonan di Kòrsou, Aruba i Sint Maarten a reuní den un asina yamá Tripartit, kaminda ta trata temanan ku ta toka e islanan aki so i tambe ta hasi sierto preparashon pa IPKO.

Durante di e dia aki a trata entre otro e trayekto ku e paisnan lo sigui enkaminá pa yega na un konsepto di un Areglo di Disputa (Geschillenregeling). A stipulá algun punto konkreto mará na un liña di tempu pa por finalisá i entregá e promé konsepto di un Areglo di Disputa. Tambe a papia tokante e aspektonan rondó di konekshon aéreo entre e islanan, ku e meta pa yega na un mihó tarifa ku ta kumbiní siudadanonan ku ta biba i ta hasi uso di e tráfiko aéreo entre e islanan. Ademas a deliberá tokante e posibel ròl di e parlamentonan durante e siguiente Konferensia di Reino, ku ta keda organisá dor di gobièrnunan den Reino.

Por último, e delegashonnan a prepará riba e diferente tópikonan ku lo keda tratá den e IPKO, ku lo kuminsá mañan mainta. Un dje temanan ku sigur tin atenshon speshal, ta e situashon di studiantenan di Karibe na Hulanda.