Ministerio di Hustisia ku konferensia Komunikashon Modèrno

Djaluna 5 i djamars 6 di yüni 2023 komunikadónan den e kadena hudisial a sigui un konferensia titulá Komunikashon Modèrno, organisá pa Ministerio di Hustisia. Meta di e konferensia di dos dia akí tabata pa siña traha ku instrumentonan nobo ku tin den e área di komunikashon, mirando ku mundu ta avansando den e forma digital.

Pa por a logra esaki tabatin 4 persona, ku di forma boluntario, a yuda pasa konosementu ku nan tin pa e komunikadónan. Den e kaso akí ta trata di:

– Merrill Sulvaran, mihó konosí komo Lilo Sulvaran, kende ta direktor di Kontentu Media. El a trata e tópiko Strategic Communication in a Changing Environment (Komunikashon Stratégiko den Ambiente ku ta Kambiando).

– Luzmarie Ster kende a trata e tópiko Social media (Whatsapp Business, Facebook & Meta Business Suite, Corporate Instagram i Youtube).

– Jourich Christina, direktor di PLUZ Marketing i Multimedia, a trata e tópiko Digital marketing (merkadeo digital).

– Richard Riedel, direktor di Snelleweb, a trata e tópiko Chat GPT.

Ademas, tabatin algun miembro di prensa presente. Nan a interkambiá ku sala tokante diferente kaso i eventual pregunta ku por a bin dilanti. Miembronan di prensa ku a partisipá den e seshon akí tabata Glenn Thomas, Lysandra Trinidad, Angelo Virginie i Lilo Sulvaran.

Na final di e dos dianan di e konferensia Komunikashon Modèrno sr. Gerold Daantje, direktor di Sektor di Mantenshon di Lei, Orden Públiko i Seguridat, a hasi entrega di sertifikado na e empleadonan públiko ku a sigui e konferensia. Tambe a hasi entrega di sertifikado na e kapasitadónan komo gradisimentu pa por a duna di nan tempu pa kapasitá e diferente personanan.