Petishon pa dirigí pregunta na Minister di tráfiko transporte i planifikashon urbano
Presidente di Parlamento di Kòrsou
Señora Ch. America-Francisca
Wilhelminaplein # 4
PRESENTE
Willemstad, 7 di yüni 2023
Tópiko: Petishon pa dirigí pregunta na Minister di tráfiko transporte i planifikashon urbano
Señora America-Francisca,
Pa medio di e karta aki, hasiendo uso di artíkulo 96 di Reglamentu di órden di Parlamento, mi kier pidi bo persona pa dirigí e karta athunto na Minister di tráfiko, transporte i planifikashon urbano señor ing. Charles Cooper.
Danki pa e koperashon.
Atentamente,
David Seferina
Parlamentario pa
frakshon di MFK
tráfiko, transporte i planifikashon urbano
Señor ing. Charles Cooper
PRESENTE
Kòrsou, 7 di yüni 2023
Tópiko: Ketu bai no tin klaridat riba kontrol di kalidat di kombustibel pasobra “ de slager keur zijn eigen vlees”
Señor ing. Charles Cooper,
Miembro di parlamento pa frakshon di Movementu Futuro Kòrsou ( MFK) , David Seferina a tuma nota ku despues di e splikashon di Curoil tokante di e rapòrt ku ta indiká e mal kalidat di kombustibel te ainda ta reina i ku tin bastante konfushon den e komunidat riba e kaso aki.
Durante di un programa kaminda tabatin debate entre periodistanan i gerensia di Curoil, Curoil den e kaso aki a indiká ku segun “richtlijnnan” ku tin, esun ku ta responsabel pa kontrolá kalidat di kombustibel na pòmpnan ta “Bureau Telecommunicatie & Post”(BT&P)tin ku hasi esaki. Te kaminda ku Curoil ta na altura, e kontrol aki no ta sosodé. Tambe gerensia di Curoil a indiká ku dor ku nan mes ta kue muestra for di nan tankinan i kontrolá esakinan i ku nan ta kumpli den e kaso aki 100% ku e richtlijnen, ta p’esei esaki ta inkomprendibel pa ami komprondé kon curoil mes ta kue muestra di su produkto den su mes tankinan anto hasi tèstnan riba e produkto aki i konstatá ku curoil ta kumpli 100% ku e “richtlijnen” , kon esaki ta posibel, “de slager keur zijn eigen vlees”.
BT&P tambe a tuma nota di ekspreshonnan hasi durante di e programa di Curoil. Konsekuentemente BT&P a emití un komunikado i klarifiká un ke otro riba e proseso aki. BT&P a indiká ku den e instrukshon ku gobièrnu a pone na aña 2011, esaki no tabatin un base legal a base di kua BT&P por kontrolá i duna sanshon riba kualke infrakshonnan. Tambe BT&P a duna di konosé den su komunikado ku for di aña 2019 a inisiá un trayekto pa bin ku un “lei di energia” ku ta ofresé entre otro un base legal kaminda BT&P lo por aktua i duna sanshon den kaso di inkumplimentu.
Despues ku Frakshon di MFK a tuma nota di ámbos deklarashon esta di tantu Curoil i tambe BT&P, suskrito ta yega na e konklushon ku no tin un base hurídiko pa hasi e kòntròlnan nesesario pa ku kalidat di kombustibel na pòmpnan di tantu curoil i esunnan priva riba kalidat di kombustibel ku ta bende ku pueblo di Kòrsou.
P’esei pa medio di e karta aki i hasiendo uso di artíkulo 96 di Reglamentu di órden di Parlamento, suskrito kier hasi e siguiente preguntanan na Minister di tráfiko, transporte i planifikashon urbano señor ing. Charles Cooper
- Minister por splika Parlamento ku ta bèrdat BT&P no tin un base hurídiko pa hasi e kontrol ni tampoko duna sanshon si ta nesesario na doño nan di pòmp?
- Minister ta konsiente ku si no tin un base hurídiko pa kontrolá i duna sanshon ku e konsumidó tin ku karga tur e konsekuensianan di daño i perhuisio na su vehíkulo?
- Minister por splika parlamento unda e proyekto di lei di energia ku ta duna outoridat pa hasi BT&P e reguladó ta pega?
- Minister por splika parlamento ki dia e proyekto di lei aki ta yega parlamento?
- Minister por splika parlamento ku den e proyekto di lei ku mester yega parlamento e “richtlijn’’ nobo tambe ta pone den dje?
- Ta ken alfinal ta karga e responsabilidat pa ku kalidat di kombustibel ku ta bende ku pueblo di Kòrsou, ta 1. Curoil, 2. BT&P òf 3. Gobièrnu?
Rekordando bo persona na e obligashon den nos areglo di estado pa duna miembronan di parlamento tur informashon rekerí i na e obligashon den e protokòl firma entre parlamento i gobièrnu pa duna e informashon aki no mas tarda ku denter di (2) luna, frakshon di MFK ta keda en espera di bo kontesta.
Atentamente
David Seferina
Parlamentario pa
frakshon di MFK
