RDK I GLOBAL TA FIRMA AKUERDO PA PRODUKSHON I EKSPORTASHON DI ASFALT
RDK I GLOBAL TA FIRMA AKUERDO PA PRODUKSHON I EKSPORTASHON DI ASFALT
Den e promé fase lo tin mester di más ku 300 kontratista
Willemstad, 7 di Yüni 2023 – Durante un seremonia ofishal ku lo tuma lugá djaweps 8 di yüni, Refineria di Korsou i Global Oil Management Group lo firma un akuerdo di 5 aña pa entre otro produkshon i eksportashon di asfalt. Global Oil Management Group (GOMG), ku ta un di e lidernan den e merkado niche di produkshon i eksportashon di asfalt, seguidamente lo kuminsá ku preparashon di e instalashonnan nesesario pa operashon. E kolaborashon aki no ta stroba e proseso ku ta kanando pa yega na un operadó pa nos refineria.
Refineria di Korsou (RdK) ya pa algun tempu ta den negosashon ekstenso ku Global Oil Management Group (Global) pa yega na un akuerdo pa Global produsí i transportá prinsipalmente asfalt pa e merkado di Merka. Na promé instante mester bisa ku pa e próksimo 5 aña Global lo ta responsabel pa e operashon, mantenshon i produkshon di asfalt na RdK Emmastad. Global lo kuminsá mes ora, i e próksimo lunanan lo invertí miones di dollar merikano pa por start ku preparashon di produkshon. Pa esaki lo tin mester di apróksimadamente 300 kontratista. Alabes Global a sera un ‘service agreement’ ku CRU pa entre otro servisionan spesialisá, servisionan di laboratorio, seguridat i brantwer. Global lo usa entre 10 pa 15% di e unidatnan di RdK, kual pa RdK ta nifiká ku e mester subi su kantidat di kupo di trabou ku empleadonan ku ta responsabel pa mantenshon i produkshon. Pafó di RdK tambe ta premirá un spin-off pa negoshinan, prinsipalmente negoshi i aktividat den haf.
E desaroyonan aki, meskos ku e inisiativanan duradero di RdK riba su tereno, lo no stroba e meta prinsipal di RdK, kual ta e proseso pa yega na un partner stratégiko ku lo manehá i operá e refineria. Den e akuerdo ku Global tin un klousulá ku ta spesifiká ku si ta nesesario, por ehèmpel si e futuro operadó ke manehá e operashon relatá na asfalt tambe, por para e kolaborashon teniendo kuenta ku un periodo di preaviso. RdK ta sigui ku su esfuersonan i lo informá komunidat di desaroyonan segun e proseso pa e buskeda aselerá ta kanando.
