KIKO TA PASANDO

E uniko kaminda ku bo ta haña tur informashon kompletamente gratis. Klik anto lesa. Manda tur loke bo ke pa wordu publika i invitashon pa kubri rueda di prensa na e Email: kikotapasando@outlook.com

GOBIERNU

Promé Minister sr. Gilmar Pisas a REUNÍ KU UNIDAT ORGANISASHON PENSHONADO BOU DI APC

Promé Minister sr. Gilmar Pisas a REUNÍ

KU UNIDAT ORGANISASHON PENSHONADO BOU DI APC

 

Willemstad – Promé Minister sr. Gilmar Pisas, huntu ku Minister di Maneho di Gobernashon, Planifikashon i Servisio Públiko sr. Ornelio Martina i nan respektivo konseheronan, a reuní ku e Unidat Organisashon Penshonado Bou di APC dia 16 di yüni 2023.

 

E unidat aki ta formá pa representante di e Sindikatonan di ABVO, UPAH (Union pa Adelanto i Hustisia), APT (Asosashon Penshonadonan di Telekomunikashon), APPK (Asosashon Penshonadonan Polisial Korsou) i MPK (Movementu Penshonadonan di Kodela).

 

Durante di e reunion aki a trata e siguiente puntonan:

  1. Lei di penshun art. 30 insiso 1;
  2. Penshunadonan ku ta kai bou di un NV òf fundashon di Gobièrnu ku nunka a haña nan indexering paga;
  3. Penshunadonan ku ta kai bou di un NV òf fundashon di Gobièrnu ku a keda likidá dor di Gobièrnu ku ainda tin di haña nan indexering paga;
  4. E 10% di “duurtetoeslag”.

Pa ku e lei di penshun art. 30 insiso 1 (Pensioenlandsverordening overheidsdienaren) e representantenan di Unidat Organisashon Penshonado Bou di APC a indiká ku e artíkulo aki no ta benefisiá e penshonado.

Minister di Maneho di Gobernashon, Planifikashon i Servisio Públiko sr. Ornelio Martina a indiká ku e tema aki ta unu ku mester keda trata den CGOA i ku defakto e ta konosí kaba den CGOA. Minister sr. Martina a splika ku e lo bai pidi pa instituí un grupo di trabou den CGOA pa por kaba di atendé ku e punto aki.

 

Pa ku e situashon di penshonadonan di NV i fundashonan di Gobièrnu a splika ku e loke ku ta hasi doló ta e “indexering” ku pa diferente motibu a keda atras pa varios aña.

Un aspekto importante ku a bini dilanti ta ku mester bai investigá i analisá ta ken ta responsabel pa paga e “indexering” aki na su debido tempu.

Promé Minister sr. Pisas a pidi e representantenan di Unidat Organisashon Penshonado Bou di APC pa pone tur opinion i punto di bista pa ku e problemátika aki den un karta, pa asina Gobièrnu por bai buska e informashon i solushon nesesario pa e problemátika aki ku ya tin varios aña ta andando.

 

Por último a elaborá riba e rekorte di 10% “duurtetoeslag” ku tin den e Pakete di Pais (Landspakket).

E representantenan di Unidat Organisashon Penshonado Bou di APC a trese e realidat di diferente penshonado dilanti i tambe e realidat di e grupo di penshonado di kual e komponente di “duurtetoeslag”, komo parti di nan penshun, defakto ta mas haltu ku nan penshun mes.

Nan a splika aserka ku un rekorte den e “duurtetoeslag” lo ta un sla hopi duru pa e grupo di penshonadonan aki.

 

Di parti di Gobièrnu a indiká ku tin hopi komprenshon i atenshon pa e grupo di penshonado den nos komunidat i ku lo sigui hasi tur loke ta posibel pa nos penshonadonan por sigui gosa di tur loke pa años nan a atkerí derechi riba dje.

 

E palabrashon final tabata ku Gobièrnu ta warda riba e karta amplio di e representantenan di Unidat Organisashon Penshonado Bou di APC i alabes ta kuminsá hasi e lokenan ku ta den alkanse di parti Gobièrnu mes, pa asina por prepará pa por duna e representantenan di Unidat Organisashon Penshonado Bou di APC un kontesta i alivio riba e lokenan ku a keda elaborá durante di e reunion aki.

Esaki mirando ku ya nan a warda demasiado aña pa por yega na un solushon di e puntonan ku a keda trese dilanti.

 

E reunion a kana den un hopi bon esfera.

 

Leave a Reply

This site uses Akismet to reduce spam. Learn how your comment data is processed.