Ban dialogá i stòp di kibra konfiansa den nos trahadónan den kuido.

Ban dialogá i stòp di kibra konfiansa den nos trahadónan den kuido.

Frakshon di PAR ta preokupá pa e deklarashonnan públiko di Minister di Salubridat tokante e kalidat di kuido na CMC. E deklarashonnan di Minister por dañá e konfiansa den nos kuido públiko i den e profeshonalismo di nos trahadónan di kuido. Nos ta  urgi Minister pa enfoká riba bienestar di pashènt i trahadónan di kuido pa medio di diálogo, pa asina garantisá e trankilidat i kalidat di kuido ku nos komunidat ta meresé.

Un famia den doló ku a pèrdè un ser kerí, por tin pregunta i asta opinion skèrpi riba trato di nan ser kerí i ta komprendibel ku nan ta buska nan derechi via di instansianan manera Medisch Tuchtcollege, departamento Inspectie Volksgezondheid i tambe Korte di Hustisia. Nos tin entendí ku esaki a tuma lugá i ku tin un sentensia den e kaso, komo ku ta trata un kaso ku ta data for di 2019.

Sinembargo, pa un Minister, responsabel pa Salú Públiko, kuestioná públikamente kalidat di trabou di enfermeronan i trahadónan profeshonal den kuido, sin ni buska informashon korekto, ta tacha públikamente e konfiansa den nos kuido públiko i den e profeshonalismo di nos trahadónan den kuido.

Ta bira pió, ora e Minister sostené públikamente deklarashonnan ku ta kuestioná e kuido ku a ser duná dor di nos profeshonalnan den periodo di COVID-19, insinuando ku hendenan a fayesé pa otro motibu (falta di kuido) i ku tin ku bini un investigashon.

Ku otro palabra: Segun e Minister, nos profeshonalnan a manipulá ku informashon òf a duna kuido robes na pashèntnan.

Trahadónan den Kuido ta traha diariamente bou di un preshon enorme. Huntu ku esaki, e tenshon ku tin públikamente entre Gobièrnu i CMC a afektá e ambiente di trabou den CMC aun mas. Tarea di un Minister di Salubridat ta, pa krea un ambiente den kua e profeshonal den kuido, por ehersé su trabou ku mente mas trankil posibel, p’e duna e pashènt e kuido ku e meresé.