DMO ta lamentá ku tin retraso den e proseso pa koregí e situashon peligroso den Keukenstraat i Sommeldijkstraat den Punda

Willemstad – Servisio pa Planifikashon Urbano (ROP) a anunsiá resientemente ku djaluna 13 di ougùstùs lo a inisiá ku dimolishon di e edifisio na skina di Keukenstraat i Sommeldijkstraat 8 den Punda.

Komunidat di Punda i Downtown Management Organization – DMO ta lamentá ku awor ku ROP a anunsiá akshon, lo bai tin un retraso pa atende ku e situashon peligroso ku tin den Keukenstraat /Sommeldijkstraat den Punda.

E edifisio menshoná pa basta tempu ta forma un peliger grandi pa tur ku ta laborá den e area, nos habitantenan i nos bishitantenan di Punda. Pesei pa DMO tabata importante ku ROP por a kuminsa ya ku pa lunanan largu e kayanan ta sera i esaki realmente ta un opstákulo grandi. VVRP i Minister Cooper a traha duru pa por logra ku ROP por a kuminsa e siman aki ku e trabounan kual DMO ta apresiá inmensamente i ta agradesí nan pa tur e preparashonnan hasi.

Pesei DMO ta surgi pa tur partido sinta na mesa urgente i yega na un akuerdo mas lihé posibel pa asina ROP por kontinuá ku e trabounan programa i hasi nos sentro di suidat safe atrobe i manera mester ta.

DMO ta hasi un apelashon tambe na henter komunidat di Punda pa tur hende yuda mantené nos Punda den un bon estado. Huntu sigur nos lo logra esaki