UN YAMADA MAS NA E EMPRESARIO PRODUKTOR DI FRUTA I BERDURA LOKAL

Willemstad- Den kuadro di un mihó sosten na produktornan lokal, Ministerio di Desaroyo Ekonómiko (MEO) a desaroyá un ‘database’ pa sektor agrario den kual MEO lo ke registrá tur produktor di fruta i berdura lokal ku ta hasi negoshi den e área akí.Pa por kuminsá logra esaki, MEO a kuminsá hasi un yamada na produktornan lokal di fruta i berdura na luna di yüli último pa registrá. Meta di e registrashon akí ta, pa fasilitá e konekshon entre produktor i supermerkado/ distribuidor pero tambe pa mehorá e proseso pa risibí un eksonerashon na momentu di importá sierto fruta i berdura (importontheffing). Aparte di tur esaki, un bon bista di e loke nos mes ta produsí i bende lokal den sektor agrario, ta yuda MEO pa por brinda mihó protekshon for di Gobièrnu na produktornan di fruta i berdura lokal. MEO ya a kuminsá traha riba adaptashonnan nesesario den e lei di eksonerashon pa importashon di fruta i berdura, pero pa e adaptashonnan akí ta kuadra mihó ku e situashon den vèlt nos mester di e informashon di e produktor lokal mes.

A base di e promé yamada, MEO ya a kuminsá risibí reakshon serka diferente produktor lokal. Pa por duna espasio na esnan ku no a risibí e yamada anterior òf no a haña chèns pa registrá, MEO ta ekstendé e yamada un bes mas na produktornan lokal di fruta i berdura ku ta hasi negoshi den e sektor akí, pa registrá pa mas tardá djabièrnè 1 di sèptèmber 2023 via e siguiente link https://bit.ly/DatabaseAgrario

Despues di registrashon, MEO ta traha un sita ku e produktor pa personalmente yena tur datonan den e database. E datonan di e database akí lo wòrdu usá solamente dor di MEO den kuadro di protekshon di e produktor lokal pa medio di e ‘importontheffing’.

Dor di introdukshon di e ‘database’ akí, MEO ta deseá di tin un mihó kontakto ku e agrarionan lokal pa salbaguardiá nan interes i limitá importashon di produkto ku ta keda produsí lokal.