PARTIDO MEP TA FELICITA SU LIDER EVELYN WEVER-CROES PA SU 12 AÑA COMO LIDER DI MEP
Partido MEP:
PARTIDO MEP TA FELICITA SU LIDER EVELYN WEVER-CROES PA SU 12 AÑA COMO LIDER DI MEP
E prome lider di MEP femenino. E prome Minister President Femenino di Aruba. E prome votegetter femenino di Aruba den eleccion 2021 y ta bay den historia pa su bon maneho durante e pandemia
MEP a ser funda dia 9 di februari 1971 y den transcurso di añanan e partido aki a contribui grandemente na e desaroyo politico, estatal, economico y social di nos pais. MEP como un partido social democrata a ser funda door di un movimiento popular a base di principionan democratico y cu un sentimento social pa bienestar di tur ciudadano den e pais aki.
MEP ta un partido cu desde su fundacion te cu awor a conoce solamente tres lider, esta sr. Gilberto F. (Betico) Croes den feliz memoria (lider 1971-1986), sr. Nelson Orlando Oduber (lider 1986-2011) y sra. mr. Evelyn Wever-Croes (lider desde augustus 2011). Asina, Lider di MEP ta bira e prome lider di MEP femenino. E prome Minister President Femenino di Aruba. E prome votegetter femenino di Aruba den eleccion 2021 y ta bay den historia pa su bon maneho durante e pandemia cu ta hibando Aruba den recuperacion.
Lider di MEP ta conta cu tur cos a cuminsa cu e vision di nos lider honorario Nel Oduber cu a pidi’e pa drenta den politica na aña 2009. Nel a fungi como lider pa 25 aña cual el a haci den un forma sublime, logrando ta 4 biaha Prome Minister di Aruba.
Na aña 2011, 28 di augustus, Evelyn Wever – Croes a asumi e reto pa lidera Partido MEP. Durante e periodo aki, tur miembro mester a custuma cu Nel no tey mas y tambe cu e estilo di liderazgo di e prome Lider di MEP femenino. Sinembargo, hunto cu tur miembro, sostenedor y candidatonan di MEP, a uni nos Partido mas y a logra haci MEP e Partido di mas grandi na Aruba. Evelyn a pasa den 4 eleccion hunto di cual 3 como lider di Partido.
Despues di eleccion 2017, Evelyn Wever-Croes a bira e prome Minister President femenino di Aruba. Den e prome periodo di Gobierno di MEP, a logra cosnan grandi pa Aruba gobernando den e pio reto cu nos pais a enfrenta. Ta p’esey tambe, MEP a gana eleccion y pueblo a expresa e gratitud den e votonan haciendo Premier Wever – Croes e prome votegetter femenino di Aruba.
Partido MEP ta felicita nos Lider, Evelyn Wever-Croes pa su 12 aña como Lider di nos Partido. Danki pa guia e Partido den gran forma cu vision y determinacion pa haci nos Partido fuerte y asumi responsabilidadnan pa goberna nos pais. Bou liderazgo di nos Lider, MEP lo sigui cu e trabou duro y logra cosnan mas grandi ainda pa Aruba.