Preguntanan na Minister den kuadro di konsekuensia di Postnan riba Facebook di Minister di Finansa tokante investigashonnan riba delitonan Penal Fiskal di Ministerio Públiko

Na: Minister di Hustisia

1. S.Hato

Wilhelminaplein 1-4

Presente

 

Kòrsou, 28 ougùstùs 2023

 

Tópiko: Preguntanan na Minister den kuadro di konsekuensia di Postnan riba Facebook di Minister di Finansa tokante investigashonnan riba delitonan Penal Fiskal di Ministerio Públiko

 

Honorabel sr. Hato,

 

Pa medio di esaki, suskrito ta aserká bo persona enkuanto lo siguiente. Manera ta konosí, 3 di aprel 2023, Ministerio di Finansa a emití un maneho nobo pa atendé ku debenan di Belasting ofer di añanan 2013-2017.

E maneho aki ta determiná ku pa e añanan ya menshoná lo kobra aktivamente solamente debenan ku ta:

1. Basá riba Investigashon/Delitonan Fiskal Penal (Outoridat di OM);
2. Si e debe ta un montante di mas ku 1 mion florin i Ontvanger sa ku tin posibilidat pa kobra esaki;
3. Si e fondonan pa paga e debe ya a ser traspasá riba un kuenta di un terser (por ehèmpel abogado òf notario)

E kondishonnan aki ta basá riba maneho di años di Belastingdienst Kòrsou.

Den su sentensia di 10 di ougùstùs 2023, Korte di Hustisia a determiná ku pa motibu di algun post riba Facebook di Minister di Finansa fin di yanüari 2023, kontrali na e maneho ya menshoná, Ontvanger no por kobra niun debe di 2013-2017 mas i spesífikamente:

1. Ontvanger no por kobra personanan ku un debe di mas ku 1 mion florin i ku Ontvanger sa ku nan tin fondo pa paga; i
2. Ontvanger no por kobra personanan ku ya a pone e fondonan pa paga nan debe un banda riba un kuenta di terser (manera abogado òf notario)

Manera tambe ta konosí, for di aña 2019, Ministerio Públiko ta enfoká riba Delitonan Fiskal Penal a base di palabrashonnan nobo ku Inspectie, Sektor di Finansa, BAB i Douane.

Den kuadro di e sentensia ariba menshoná suskrito ta aserka Minister hasiendo uso di art. 96 di Reglamentu di Òrdu ku e siguiente pregunta dirigí respekto debenan fiskal basá riba delitonan Penal Fiskal, ku ta kai bou di outoridat di Ministerio Públiko.

 

1. Minister por informá suskrito a base di e sentensianan di 10 di ougùstùs 2023 ariba menshoná, kiko ta e konsekuensia di e Post riba Facebook di Minister di Finansa pa investigashonnan riba delitonan Penal Fiskal ku Ministerio Públiko ta hibando riba añanan 2013-2017?
2. Pa ta mas konkreto, a konsekuensia di e Postnan di Minister di Finansa riba Facebook, Ministerio Públiko por sigui pèrsiguí personanan ku ta sospechá di delitonan Fiskal Penal riba añanan 2013-2017?

 

Gradisiendo di antemano pa e kontestanan mi ta keda,

 

Atentamente,

Quincy Girigorie

Miembro di Parlamento Partido Alternativa Real