“MI TIN TUR CONFIANSA CU PARLAMENTARIO TEVREDEN LO SA DI EHERCE CABALMENTE SU FUNCION COMO LIDER NOBO DI FRACCION DI MEP “
Partido MEP
Lider di partido MEP Evelyn Wever-Croes;
“MI TIN TUR CONFIANSA CU PARLAMENTARIO TEVREDEN LO SA DI EHERCE CABALMENTE SU FUNCION COMO LIDER NOBO DI FRACCION DI MEP “
“Cu su caracter, el lo sa di mantene e ekipo uni pa hunto sigui traha na bienestar di pais Aruba”
ORANJESTAD – Dialuna mainta, Lider di partido Evelyn Wever-Croes a anuncia e nombracion di Parlamentario Hendrik Tevreden como lider nobo di fraccion di MEP den Parlamento. Sr Tevreden tin un caracter poco diferente na e lider di fraccion saliente, sra Shailiny Tromp-Lee, pero e mesun determinacion, y amor pa mira pais Aruba progresa. Un aspecto positivo di su personalidad, ta cu Hendrik ta un “teamplayer”, y esaki lo yuda grandemente den guia y lidera e ekipo aki exitosamente.
“Como lider di partido MEP, mi tin tur confiansa cu Hendrik lo haci un bon trabou pa partido, lo sa di mantene e ekipo uni, pa asina hunto partido MEP sigui bay dilanti, trahando na bienestar di pais Aruba. Mi ta desea Hendrik tur clase di exito, hopi sabiduria y pasenshi pa por cumpli cu tur e responsabilidadnan cu e posicion di lider di fraccion ta trece cune” Lider di partido Evelyn Wever-Croes a expresa.
Lider di Partido MEP:
CU HOPI AGRADECIMENTO PA SU BON TRABOU, PARTIDO MEP TA DESPEDI DI SHAILINY TROMP-LEE COMO LIDER DI FRACCION DI MEP
ORANJESTAD – Dialuna mainta, Lider di partido di Movimento Electoral di Pueblo (MEP) sra. Evelyn Wever-Croes, a anuncia un cambio den partido, pa loke ta e posicion di lider di fraccion. Pa 2 aña consecutivo, Parlamentaria Shailiny Tromp-Lee (Shai), a desplega e funcion aki exitosamente. Durante su temporada como lider di fraccion, “Shai” a sa di haci su trabou cu amor y dedicacion, guiando henter e fraccion, sostene caminda tabata necesario, y yuda, caminda tabata tin mester. Pa fraccion di MEP, “Shai” tabata manera un mama, cu aunke no tur ora tabata facil, semper a percura pa durante reunionan tur hende tey y tin tur informacion necesario. Su dedicacion y esfuerso pa cumpli cu su deber como lider di fraccion ta altamente aprecia.
“Como lider di partido Mep, mi kier a gradici “Shai”pa tur e sacrificio, dedicacion y esfuerso durante su añanan como lider di fraccion. El a sa di semper ta presente, cu un caracter firme, y cu e proposito di guia e fraccion riba e caminda correcto, pa como politiconan, semper tuma e miho decisionnan den bienestar di pais Aruba. Como mama di dos yiu, e sacrificionan cu bo a haci pa cumpli cu bo deber como lider di fraccion tabata grandi y di aprecia. Un danki di curason pa e bon trabou desplega” sra Wever-Croes a expresa.
